ஜெயிக்கலாம் தோழி / அத்தியாயம் 3

வேலைக்குச் செல்லாத, 35 வயதுக்கு மேற்பட்ட திருமணமான பெண்கள் தங்கள் ஓய்வு நேரத்தை எப்படிச் செலவிடுகிறார்கள்? பெரும்பாலானோர் தொலைக்காட்சியில் சரணாகதி அடைந்துவிடுகிறார்கள். அல்லது உறக்கம். அல்லது அக்கப்போர் வெட்டிக்கதைகள்.

இவையனைத்துமே மன உளைச்சல் ஏற்படுத்தும் விஷயங்கள். நேரத்தையும் வீணாக்கி உடலையும் வருத்திக்கொண்டு இப்படி பொழுதை ஓட்டுவதற்குப் பதில் சுயதொழிலில் தன்னை ஈடுபடுத்திக்கொண்டு வீட்டுப் பொருளாதாரத்தை உயர்த்தலாமே?

இப்படிச் சொன்னால் உடனே உதிக்கும் சந்தேகம், சுயதொழில் செய்தால் வீட்டு வேலைகளை எப்படிக் கவனித்துக்கொள்வது என்பதுதான். உண்மையில், வேலைக்குப் போகும் பெண்களும், சுயதொழில் செய்வோரும் வீட்டு வேலைகளை எளிதாகவே கையாள்கிறார்கள். மற்றவர்களோ, நேரம் அதிகம் இருக்கிறது என்று கால விரயம் செய்கிறார்கள்.

ஆணுக்குப் பெண் சரிநிகர் சமம் என்று சொன்னாலும் இயல்பாக சில செயல்களைப் பெண்கள் மட்டுமே திறம்படச் செய்யமுடியும். அதேபோல சில செயல்களை ஆண்கள் மட்டுமே திறம்படச் செய்ய முடியும். அவரவர் திறமை எதில் இருக்கிறது என்று அறிந்து செயல்படும் போதுதான் வெற்றி எளிதாகிறது.

சுயதொழிலில் வெற்றி கிடைக்குமா என்னும் தயக்கமும் பலரை வீட்டுக்குள் முடக்கிவைத்திருக்கிறது. எதையும் முயற்சி செய்யாமல் தோல்வியைப் பற்றி சிந்திப்பவனைவிட, முயற்சி செய்து தோல்வி அடைபவன் மேல் என்பதை இவர்களுக்கு நினைவூட்டவேண்டும். இந்த இடத்தில் என் வாழ்க்கைப் பாதையிலிருந்து ஒரு சில அனுபவத் துளிகளை உங்களுடன் பகிர்ந்து கொள்கிறேன்.

என்னுடைய குடும்ப நண்பர் ஒருவருடன் உரையாடிக் கொண்டிருந்தேன். ‘உங்களிடம் திறமை இருக்கிறது. அறிவு இருக்கிறது. சுயமாகத் தொழிலில் ஈடுபடும் ஆர்வம் இருக்கிறது. அடி எடுத்து வைப்பதில் என்ன தடை?’ என்று அவர் கேட்டார். ஒரு சிறு பொறியாக விழுந்த இந்தச் சிந்தனை என்னைத் துரத்த ஆரம்பித்தது.

சுயதொழிலா? என்னால் முடியுமா? என் கணவர் வீடு திரும்பியவுடன் இதைப்பற்றிப் பேசினேன். தன் நண்பர்கள் சிலருடன் மின்னணு துறையில் தொழில் செய்ய முனைந்து பெரும் பிரச்னையில் அவர் திண்டாடிக் கொண்டிருந்த நேரம் அது. ஒரு பார்ட்னர் எதிர்பாராமல் இறந்துவிட்டார். மற்றொரு நபரோ கலப்புத்திருமணம் செய்து கொள்ள முடிவெடுத்ததால் இந்தியாவை விட்டு வெளியேறிவிட்டார். தொழில் பயங்கரமாக ஆட்டம் கண்டது.
கலப்புத் திருமணம் செய்து கொண்டு, எதிர்ப்புகளுக்கு இடையில் சமுதாயத்தை எதிர்நோக்கியிருந்த சமயம் அது என்பதையும் நினைவுபடுத்தவிரும்புகிறேன்.

‘நான்கு ஆண்கள் சேர்ந்து தொழில் செய்ய நினைக்கும் போதே இவ்வளவு பிரச்சனைகள். நீ தனியாக என்ன செய்வாய்?’

எது என்னைச் சுயதொழிலில் ஈடுபட வைத்தது? தன்னம்பிக்கையா? மேலே வரவேண்டுமென்ற தணியாத தாகமா? என் பிரசனைகளுக்குத் தோள் கொடுக்க அருகில் யாருமில்லையே என்ற ஆதங்கமா? இல்லை இதற்கெல்லாம் மீறிய சக்தியா? தெரியவில்லை. ஆனால், ஒன்றுமட்டும் தெளிவாகக் கூற இயலும். இவை அனைத்தும் ஒன்றிணைந்த ஒரு சக்திதான் சுயதொழிலைப் பற்றி சொந்தமாக என்னை முடிவெடுக்க வைத்தது.

பிறகு யோசிக்க ஆரம்பித்தேன். எந்தத் துறையில் இறங்கலாம்? எதில் என் பலமும் இருக்கிறது? கம்ப்யூட்டர் துறை சார்ந்து ஏதாவது செய்யலாம் என்று நினைத்தேன். முன்னரே பழக்கப்பட்ட துறை என்பது ஒரு காரணம். குறிப்பாக, என்ன செய்யலாம் என்று யோசித்தபோது, பவர் எலெக்ட்ரானிக்ஸ் துறையில் உற்பத்தி பிரிவில் இடம் இருப்பது தெரிந்தது. மின்வெட்டுகளும் மின்சாரப் பற்றாக்குறையும் அலுவல்களை மிக மோசமாக பாதித்துக்கொண்டிருந்த சமயம் அது. எனவே நிச்சயம் மின் உற்பத்திக்கான தேவை பரவலாக இருக்கும். மேற்கொண்டு அதிகரிக்கவும் செய்யும். அதனால் அந்தத் துறையையே நான் இறுதியாகத் தேர்ந்தெடுத்தேன்.

அடுத்த சில நாள்கள் என் கணவரிடம் இதைப்பற்றி மீண்டும் மீண்டும் பேசி விவாதத்தில் ஈடுபட்டேன். ‘நமக்கு அனுபவமோ பணபலமோ இல்லை. இருவரும் வாழ்வின் தொடக்கத்தில் இருக்கிறோம். நான் மட்டும் தொழில் முயற்சியில் ஈடுபடுகிறேன். நீ வேறு வேலை தேடிக்கொள்.’ என்றார் அவர்.

என்னால் அவர் விளக்கத்தை ஏற்கமுடியவில்லை. பிறகு அவர் ஒருவழியாக ஒப்புக்கொண்டார். ஒரு கன்டிஷனோடு. ‘அப்படியென்றால் உன் பெயரில் தொழில் முயற்சியை ஆரம்பித்துக்கொள். அதன் சாதக, பாதகங்களுக்கு நீதான் பொறுப்பு.’
சரி என்றேன்.

அடுத்து என்ன? நெருங்கிய உறவினர்களிடம் பேசினேன். அந்தச் சந்திப்புகளில் அவர்கள் திணிக்க முயன்ற விஷயம் ஒன்றுதான். ‘உன்னால் தனியாக எதுவும் செய்யமுடியாது. அந்த எண்ணத்தை விட்டுவிடுவததான் நல்லது. உன் நல்லதுக்குத்தான் சொல்கிறோம்.’
நான் பின்வாங்கவில்லை. கையில் சிறிதளவு பணமே இருந்தது. அதை வைத்துதான் தொடங்கியாகவேண்டும். முதலில், அலுவலகத்துக்கான இடம். அலுவலகமும் அதை நடத்துபவரின் அறையும் பெரியதாக இருக்கவேண்டும் என்ற எண்ணம் இருந்ததால் நகரின் மையப்பகுதியில் இடம் பார்த்துக்கொண்டேன்.

பெரிய அறையின் நடுவில் ஒரு நாற்காலி, சிறு மேஜை போட்டு உட்கார்ந்த தருணத்தில் மனதில் ஆயிரம் எண்ணங்கள். நான் ஜெயித்தால் சமூகத்தின் அங்கீகாரம் கிடைக்கும். தோற்றால், கிண்டலடிக்கப்படுவேன். எது கிடைக்கப்போகிறது?

இத்தருணத்தில் தாய்மையும் அடைந்தேன். வயிற்றில் கருவுடன் பண உதவி வேண்டி வங்கிகளின் கதவுகளைத் தட்டத் தொடங்கினேன். என் உற்பத்தித் தொழிலுக்குத் தேவையான பல சோதனைக் கருவிகளும் (Testing Equipments) அலுவலகத்தில் வந்து இறங்கியாகி விட்டது. கடன் கேட்கலாம் என்றால் தனி நபராக நான் பலருக்கும் அறிந்த ஆளில்லை. பிரபல வங்கி ஒன்றில் நான் கொடுத்த விண்ணப்பத்தை ஏற்று நேர்முகத் தேர்வுக்கு அழைத்திருந்தார்கள்.

காலை 11.00 மணிக்கு என்று கடிதத்தில் குறிப்பிட்டிருந்தாலும் 10.45க்கு நான் அங்கே நின்றேன். ஐந்தாவது மாடியில்தான் நேர்முகத்தேர்வும் நடந்தது. லிஃப்ட் வேலை செய்யவில்லை. ஐந்து மாடிகளையும் கடந்து மேலேறி அமர்ந்தபோது, அந்த வங்கிப் பணியாளர் உங்கள் முறை வருவதற்கு குறைந்தது இன்னும் இரண்டு மணிநேரம் காத்திருக்க வேண்டுமென்றார். காலையில் ஏற்படும் அயற்சி காரணமாகச் சாப்பிட எதுவும் பிடிக்காததால் சிறிது கஞ்சி மட்டும் எடுத்துக் கொண்டு வீட்டை விட்டுப் புறப்பட்டிருந்தேன்.

ஏதாவது சாப்பிடலாம் என்றாலோ ஐந்து மாடி இறங்கி ஏற வேண்டுமே என்ற பயம். என்னைப்போல் பல ஆண்களும் பெண்களும் நேர்முகத் தேர்வுக்காகக் காத்துக் கொண்டிருந்தார்கள். முன்பின் தெரியாத அலுவலகத்தில், அதுவும் கடனுக்காக வந்துள்ள நிலையில், அங்கு பணிபுரிபவர்களிடம் என் நிலையைச் சொல்லி ஏதாவது வாங்கி வந்து தாருங்கள் என்று சொல்வதும் சரியில்லையென்பதால், மனதை ஒருமுகப்படுத்தி நேர்முகத்தேர்வை எப்படி சிறப்பாகச் செய்வது என்பதைப் பற்றிய சிந்தனையில் மட்டும் நேரத்தைக் கடத்தினேன்.

இடையில் வந்த சூடான காபி பசித்தவன் கையில் கிடைத்த உணவைப் போலாயிற்று. சுமார் மூன்று மணி நேரக் காத்திருத்தலுக்குப்பின் உள்ளே அழைக்கப்பட்டேன். மிகப் பெரிய நவீன அறையில் சுமார் ஆறு பேர் மர்ந்திருந்தார்கள். இரண்டுபேர் சாதாரண முறையில் கேள்விகளைக் கேட்டபோதும், மற்ற நால்வர் ‘பெண்கள் சுய தொழிலுக்கு வருவதைப் பற்றிய, அதுவும் எந்தவிதமான வர்த்தகத் தொடர்பும் இல்லாத குடும்பத்திலிருந்து வருவதை’ ஏற்றுக்கொள்ள முடியாதவராக இருந்தார்கள்.

தேவையற்ற பணிவோ, அசாதாரணமான பொய்களோ இன்றி, நம்பிக்கையுடன் பதிலளித்தேன். என் பதில் அவர்களைத் திருப்திப்படுத்தவில்லை என்பதை நேர்முகத் தேர்வு முடிந்தபோது தெரிந்தது. ஒரு பெரிய கதவு எனக்காகத் திறக்கப் போகிறது என்னும் ஆர்வம் மறைந்த நிலையில் அடுத்தது என்ன என்று யோசிக்கத் தொடங்கினேன்.

ஜெயிக்கலாம் தோழி / அத்தியாயம் 5

உலக நாடுகளைப் பொறுத்தவரை இந்தியா என்பது மிகப் பெரிய, வளமான சந்தை. நாம்தான் இதனை ஒரு வாய்ப்பாக உணர மறுக்கிறோம். மேம்போக்கான காரணங்கள் கூறி சுயதொழிலை நிராகரிக்கிறோம்.

சரி, எனக்கு ஏற்ற தொழில் எது என்பதை எப்படித் தீர்மானிப்பது? ஒரு சிறிய உதாரணம்.

கண்மணி அதிகம் படித்தவரல்லர். பொருளாதார நெருக்கடிகளைச் சமாளிக்கவேண்டுமானால் வேலைக்குப் போயே தீரவேண்டும். ஆனால் அதற்கும் பல தடைகள். இவருக்கு விதவிதமாக உணவுப் பண்டங்கள் சமைப்பதில் அலாதி பிரியம். எப்போதும் ஏதாவது ஒன்று செய்து கொண்டேயிருப்பார். ஒரு ஞாயிற்றுக்கிழமை, புது வகையான இனிப்பு பண்டத்தை செய்ய முயற்சி செய்தார். வீட்டிலுள்ளோர் அனைவரும் பாராட்டினர்.

சில தினங்களில் அவருடைய கல்யாண நாள் வந்தது. தன்னுடைய நெருங்கிய உறவினர்களையும் நண்பர்களையும் வீட்டுக்கு விருந்துக்கு அழைத்திருந்தார். என்ன செய்யலாம் என்று வீட்டில் பேசிக்கொண்டிருந்தபோது அவர்கள் ஒருமித்த குரலில் இதைத்தான் சொன்னார்கள். அன்று ஒரு இனிப்பு செய்தாயே, அதையே செய்துவிடு.
கண்மணியும் மற்ற உணவு வகைகளோடு சேர்த்து இந்த இனிப்பையும் கொஞ்சம் அதிகமாகச் செய்து, விருந்தினர்களுக்குப் பரிமாறினார். விருந்தும் இனிதே முடிந்தது. அனைவரும் பாராட்டித் தீர்த்தபிறகே வெளியேறினார்கள்.

ஒரு நாள் பத்திரிகையில் வந்த ஒரு விளம்பரத்தை தற்செயலாகப் பார்த்தார். ஒரு போட்டிக்கான விளம்பரம் அது. நல்ல கைமணமுள்ள பெண்கள் தங்கள் திறமையை வெளிக்கொணர ஒரு போட்டியை அறிவித்திருந்தார்கள். கண்மணியும் வீட்டிலுள்ளோர் விருப்பத்துக்கும், வற்புறுத்தலுக்கும் கட்டுப்பட்டு அந்தப் போட்டிக்கு நுழைவுத்தாளை அனுப்பினார். பலத்த போட்டிக்கு நடுவில் அவர் முதல் பரிசுக்குரியவராகத் தேர்ந்தெடுக்கப்பட்டார்.

அந்தப் பரிசளிப்பு விழாவை ஒட்டி நடந்த கண்காட்சியில் ஒரு ஸ்டால் போடுவதற்கு அனுமதி அளித்தனர். தனக்குத் தெரிந்த அந்த இனிப்பு வகையைச் செய்து அடுக்கி வைத்தார். அனைத்தும் விற்றுத் தீர்ந்த பிறகு கிடைத்த லாபம் பெருமகிழ்ச்சியைக் கொடுத்தது.

சுயதொழிலா, நானா என்று காத தூரம் ஓடிப்போன கண்மணிக்குள் ஒரு சிறு பொறி. பணம் மட்டுமா கொடுக்கிறது இந்தப் புதிய முயற்சி? பாராட்டுகள். தொழில்திருப்தி. அளவிடமுடியாத மகிழ்ச்சி. வேறு என்ன வேண்டும்?

சீரியசாக யோசிக்கத் தொடங்கினார். தொழில் முயற்சி தொடங்கியது. சில பயிற்சி மையங்களில் இணைந்து வேறு பல புதிய பதார்த்தங்களைத் தொழில் ரீதியாகச் சமைக்கக் கற்றுக்கொண்டார். வங்கியில் சிறு தொகை கடன் வாங்கினார். சொந்த நிறுவனம் வளர்ந்தது. இன்று ஐந்து, ஆறு பெண்களுக்கு வேலைவாய்ப்புக் கொடுத்து, மிகச் சிறந்த முறையில் தொழில் செய்து வருகிறார்.

எதற்கு ரிஸ்க் வேறு ஏதாவது செய்யலாமே என்று இன்று யாராவது அவரிடம் சென்று கூறினால் நிச்சயம் அவர் அதனைப் பொருட்படுத்த மாட்டார். சுயதொழில் அவரை மட்டுமல்ல அவரைச் சார்ந்துள்ள சிலரையும் இன்று வாழ வைத்துக்கொண்டிருக்கிறத. இதில் கிடைக்கும் சுகம், சந்தோஷம், ஆத்ம திருப்தி ஆகியவற்றை அனுபவிப்பவர்களால் மட்டுமே புரிந்துகொள்ளமுடியும்.

0

கண்மணியின் கதை நமக்கெல்லாம் ஒரு பாடம். அவரைப் போல் நமக்குள்ளும் பல விருப்பங்களும் தனித் திறமைகளும் ஒளிந்துகொண்டிருக்கின்றன.

நம்மில் பெரும்பாலோர் நமது சுய மதிப்பீட்டில் பெரும் தவறு செய்து விடுகிறோம். இதன் காரணமாக ஒன்று நம்மைப் பற்றி மிக தாழ்வான அபிப்பிராயத்தை உருவாக்கிக்கொள்கிறோம். அல்லது மிதமிஞ்சிய அளவுக்கு நம் திறமையின்மீது நம்பிக்கை வைத்து எனக்கு ஈடு எவரும் இல்லை என்று கூறிக்கொள்கிறோம்.

இந்த இரண்டு நிலையையும் எடுக்காமல் நடுநிலையோடு நம்மை நாமே சுய விமர்சனம் செய்து, நமக்குள் புதைந்து கிடக்கும் திறமைகளைத் தூசித்தட்டி வெளிக்கொணர்ந்து, உண்மையான உழைப்பை முதலீட்டாக்கினால் வெற்றி நிச்சயம்.

சுயதொழிலுக்கு வர விரும்புவோர் கவனத்தில் கொள்ள வேண்டிய விஷயங்கள் இவை.

1. சுய தொழிலில் செய்த முதலீட்டுக்கு உடனடி அறுவடை கிடைக்காது. இதை மிகுந்த கவனத்தில் மனத்தில் வைத்துக்கொள்ள வேண்டும். செய்யும் தொழிலின் தன்மையைப் பொறுத்து லாபம் ஈட்டுதல் என்பது அந்தந்தச் சூழலுக்கேற்ப மாறுபடும். அதனால் பொறுமை மிக மிக அவசியம்.
2. எந்தத் தொழிலும் கடலில் கரைக்கும் உப்பாக மென்மேலும் முதலீட்டை இழுத்துக் கொள்ளும் தன்மை கொண்டது. தொழில் செய்பவர், அவரின் பணபலம் என்ன, தான் எதுவரை தாக்குப் பிடிக்க முடியும் என்பதில் சீரிய கவனத்தோடு செயல்படவேண்டும். முதலீட்டுக்காகத் திட்டமிடும்போது இதனை மனத்தில் வைத்திருக்கவேண்டும்.
3. தொழிலின் சந்தையைப் பற்றிய தகவல்களைத் தொடர்ந்து திரட்டவேண்டும். மாறும் சூழலுக்கேற்ப முடிவுகளை மாற்றிச் செயல்படவும் தெரிந்து கொள்ள வேண்டும்.
4. உணர்வுப்பூர்வமாக அணுகுமுறை தொழிலுக்கு, அதுவும் முக்கிய முடிவுகள் எடுக்கும் போது, தவிர்க்கப்பட வேண்டும். மாறாக புத்தி பூர்வமான அணுகுமுறை கையாளப்படவேண்டும். உறவு, நட்பு போன்ற வலைப் பின்னல்களில் மாட்டிக்கொண்டு தொழிலைச் சிக்கலாக்கிக்கொள்ளக்கூடாது.
5. கடன் கொடுக்க வங்கிகளும் நிதி நிறுவனங்களும் தயாராக இருந்தாலும், கூடிய மட்டும் கடனைக் குறைத்துக்கொள்ளவேண்டும்.
6. ஒரு தொழில் ஆரம்பிக்கும் வரைதான் தொழிலதிபரின் முயற்சியும் அறிவு கூர்மையும் முதன்மை பெறுகின்றன. அது தொடர்ந்து வளரும் போது, அதன் சாதகங்கள் தொதிலதிபரைச் சேர்ந்தாலும், அதன் பாதகங்கள் அவரை மட்டுமல்லாது அதை சார்ந்துள்ள பலரையும் பாதிக்கும். எனவே, தொழிலைத் தீவிரமாக நேசிப்பவர்கள் மட்டுமே இதில் காலடி எடுத்து வைக்கவேண்டும். பகுதி நேரமாகச் செய்து பார்ப்போமே என்று அலட்சிய மனோபாவத்துடன் தொழிலில் இறங்குவது பயனளிக்காது.
7. இன்றைய சூழலில் சிறுதொழில் செய்ய முன்வருபவர்கள் தொழிலின் பல்வேறு பகுதிகளைப் பற்றி ஓரளவுக்காவது அறிவை வளர்த்துக்கொள்ளவேண்டும். உதாரணம், சேல்ஸ் & மார்க்கெட்டிங், ஆள்கள் நியமித்தல், நிதி, நிர்வாகம், மனித வளம், தொழில்நுட்பம் ஆகியவை.
8. எல்லாவற்றுக்கும்  பிறரை முழுவதுமாக அண்டியிருக்கக்கூடாது. தொழிலை தடையில்லாமல் நடத்திச் செல்லவேண்டுமானால், தொடர்ந்து நம் திறமைகளைக் கூர் தீட்டிக் கொண்டே இருக்க வேண்டும்.

ஜெயிக்கலாம் தோழி / அத்தியாயம் 7

எது நமக்கான தொழில் என்று தீர ஆராய்ந்து முடிவெடுத்த பிறகு கீழ்வரும் விஷயங்களைக் கவனத்தில் கொள்ளவேண்டும்.

உங்களுடையது முதல் தொழில் முயற்சி என்றால், உங்களுக்கு ஏற்ற முதலீட்டை மட்டும் போட்டு ஆரம்பியுங்கள். அகலக்கால் நினைப்பு வேண்டாம். மேலும், உங்கள் முயற்சி தனி முயற்சியாக இருப்பது உத்தமம். உறவினருடனோ, நண்பருடனோ சேர்ந்து தொழிலில் ஈடுபடுவதாக இருந்தால், உங்களைப் போலவே அவர்களும் உண்மையான, நேர்மையான வெளிப்படையான கருத்துப் பரிமாற்றம் உள்ளவர்களாக இருத்தல் மிக அவசியம். அப்படி இல்லாவிட்டால் ஆரம்பக் கட்டத்திலேயே மன வருத்தம் உண்டாகிவிடும். இதனால் செய்யும் தொழில் பாதிக்கும். லாபமோ, நஷ்டமோ உங்கள் தனித்திறமைகளை முன்வைத்துத் தொடங்கும் போது, உங்களுடைய குறைகளை நீங்களே அறிந்து கொள்ளும் வாய்ப்பு கிடைக்கும்.

குறுந்தொழிலோ, சிறு தொழிலோ செய்பவர் தன்னை ஓர் உழவருடன் ஒப்பிட்டுக்கொள்ளவேண்டும். நிலம், நீர் அனைத்தும் இருந்தாலும் சிறந்த அறுவடையை மனத்தில் இருத்திக்கொண்டு ஒரு உழவர் கடுமையாக உழைக்கிறார். அதைப் போல் தொழில் முனைவோர் தனது செயல்திறனைப் பயன்படுத்தி இலக்கைக் குறிவைத்து உழைக்கவேண்டும். ஒருவரது உழைப்பைப் பொறுத்தே அறுவடை எத்தனை ஆண்டுகளுக்குக் கிடைக்கும் என்பது உறுதி செய்யப்படுகிறது.

சிலர், லாபம் கிடைத்தவுடன் உடனே செலவு செய்யவும் ஆரம்பித்துவிடுவார்கள். கல்லாவில் சில்லறை சேர்ந்தவுடன் ஒரு ஓட்டல் முதலாளி அதனை எடுத்துக் கொண்டு காணாமல் போனால் எப்படி இருக்குமோ அப்படிப்பட்டதுதான் இதுவும். இடத்துக்கான வாடகை, மின்சாரக் கட்டணம், போக்குவரத்துச் செலவு, சப்ளையர்களுக்குத் தரவேண்டிய பாக்கி, வங்கிக் கடன் போன்றவற்றுக்கு முன்னுரிமை கொடுத்துவிட்டு, மிச்சமிருப்பதை சேமிப்பாக வைத்துக்கொள்ளவேண்டும். மிகச் சிறு பகுதி மட்டுமே செலவுகளுக்கு.

பிரமிக்க வைக்கும் அளவுக்கு பணம் ஈட்டியவர்களையும் நம்பமுடியாத அளவுக்கு அவற்றைத் தொலைத்தவர்களையும் நான் கண்டிருக்கிறேன். செல்வம் என்பது கையை விட்டு செல்லக் கூடிய ஒரு கருவி. தக்க வைத்துக் கொள்ளும் சூத்திரம் அறியாதவர் எவ்வளவு ஈட்டினாலும் பிரயோஜனம் இல்லை. சிறு லாபம் வந்தவுடன் நிலை தடுமாறி வாழ்க்கைத் தரத்தை மிக அதிகமாக உயர்த்திக் கொள்ளும் பெரும்பாலோரை நான் கண்டிருக்கிறேன். தொழிலிலிருந்து வரும் நிகர லாபத்தின் ஒரு பகுதி அந்தத் தொழிலை மேம்படுத்துவதற்குச் செலவு செய்ய வேண்டியது அவசியம். தொலைநோக்கு மிக அவசியம்.

நாற்பது வயதுக்குமேற்பட்ட பலரும் பொதுவாக இவ்வாறு கூறுவதுண்டு. ‘நான் கூட சிறிது காலம் தொழிலில் ஈடுபட்டேன். ஆனால் எதிர்பாராத முன்னேற்றம் இல்லாததால், அத்தோடு விட்டுவிட்டேன்.’ எந்தவொரு தொழிலையும் நின்று, நிதானித்து, நிலைத்து நிற்கும்படி தொடர்ந்து நடத்துவதில்தான் திறமை அடங்கியுள்ளது. சிறிது காலம் அதைச் செய்தேன், சிறிது காலம் இதைச் செய்தேன் என்று சொல்பவர்கள் தொழிலைத் தீவிரமாக எடுத்துக் கொள்ளாமல், ஒரு மேம்போக்கான உந்துதலில் தொடங்கி இருப்பவர்களாக இருக்கவேண்டும். இல்லையேல் தொழில் ஆர்வத்திலிருந்து அவ்வளவு சீக்கிரம் பின்வாங்கிட முடியாது.

உலகளாவிய அளவில் நிர்வாகவியல் குறித்து ஆய்வுகள் நடத்தியிருப்பவர்கள் ஒப்புக்கொள்ளும் ஒரு விஷயம் இது. ஒரு தொழிலின் வீழ்ச்சிக்குக் காரணம் அந்தத் தொழிலை நடத்துபவர்தானே தவிர, அந்தத் தொழிலால் ஏற்படும் இடர்பாடுகள் அல்ல. முன்பெல்லாம் பிசினஸில் இறங்கவேண்டுமானால் ஒருவருக்கு தொழில்நுட்ப அறிவு (Technical expertise) மட்டும் போதும் என்று சொல்வார்கள். ஆனால் இன்றோ நேர்மையான எண்ணம், நிர்வாகத் திறமை, பிரச்னைகளைக் கையாளும் விதம், கடுமையான உழைப்பு, சமூக அக்கறை ஆகிய அனைத்தும் தேவைப்படுகின்றன.

இதைப் படிக்கும்போது உங்கள் மனதில் ஒரு கேள்வி எழலாம். வண்ணமயமான விளம்பரங்கள், பகட்டு வார்த்தைகள், ஆடம்பரமான மக்களைக் கவரும் உத்திகள் போன்றவற்றைச் செய்துதானே பெரும்பாலான நிறுவனங்கள் தொழிலை நடத்திக் கொண்டிருக்கின்றன? சற்று முன் பார்த்த அம்சங்கள் எங்கே இருக்கின்றன? என்றால், என் பதில் இதுதான். உண்மை, உழைப்பு, உறுதி ஆகியவை நம் வசம் இருந்தால் நம் முயற்சி முழு வலிமையுடன் நிச்சயம் வெற்றியடையும். மற்றபடி, பொய்மையும் போலித்தனமும் நிச்சயம் ஒருநாள் நம்மைக் கீழே இழுத்துவிடும்.

இன்று மக்கள் வேகமாக முடிவெடுத்து ஒரு பொருளையோ ஒரு நிறுவனத்தையோ நம்பிவிடுகிறார்கள். அதே போல், மிக எளிதாக தங்கள் எண்ணத்தை மாற்றிக்கொண்டும் விடுகிறார்கள். உண்மைத்தன்மை இல்லாவிட்டால் எந்தவொரு நிறுவனத்தாலும் தாக்குப்பிடிக்கமுடியாது. அதனால் தரமான பொருளையோ, சேவையையோ மக்களுக்கு அளிப்பது ஒவ்வொரு தொழிலிலும் ஈடுபடுவோரது கடமையாகும்.

0

ஒரு தொழிலில் ஈடுபடுபவரின் பிரச்னையும் மன உளைச்சலும் அந்த அனுபவத்தைப் பெற்றவர்களால் மட்டுமே உணரமுடியும். பொதுவாக நமது சமுதாயத்தில் பிசினஸ் செய்பவர்களைப் பார்த்துப் பெருமூச்சு விடுபவர்களே அதிகம். அவர்களுக்கென்ன பிசினஸில் பணம் அள்ளி எடுக்கிறார்கள் என்றுதான் அவர்கள் சொல்வார்கள். அவர்களுடைய ஏக்கங்களை ஒதுக்கிவைத்துவிட்டு தொழிலில் முழுக்கவனத்தைக் குவிக்கவேண்டியது அவசியம்.

தகுதியான நபர்கள் இல்லாமல் எந்தவொரு தொழிலையும் நடத்தமுடியாது. உங்கள் உறவினருக்கோ நண்பருக்கோ உங்கள் நிறுவனத்தில் வேலை வாய்ப்புத் தருகிறீர்கள் என்று வைத்துக்கொள்வோம். அந்த நபர் அவருக்குரிய வாய்ப்பைச் சரியாகப் பயன்படுத்தாத பட்சத்தில் அவரை வெளியேற்றுவதில் எந்தவித தயக்கமோ, உணர்வுப் பிரச்னையோ எழக்கூடாது. பரவாயில்லை, பொறுக்கலாம் என்று தவறுகளைப் பொறுத்துக்கொள்ளத் தொடங்கினால் அதுவே அந்தத் தொழிலின் வீழ்ச்சிக்குப் பெரும் காரணமாக அமைந்துவிடும். பெரும்பாலான சிறு தொழிலதிபர்கள் ஒரு சில தொழிலாளர்களை அளவுக்கு அதிகமாக நம்பி விடுவார்கள்.

எந்தவொரு தொழிலையும் தொடங்குவதற்கு முன்பு அதை நீங்கள் தனி நபராகச் செய்யப்போகிறீர்களா அல்லது கூட்டுத் தொழிலாகச் செய்யப்போகிறீர்களா என்பதைப் பற்றித் தீர்மானமான, தீர்க்கமான முடிவை எடுப்பது மிக அவசியம். தனிப்பட்ட நட்பு வேறு, தொழில்முறை உறவு வேறு. இதைப் புரிந்துகொள்ள தவறினால் மன உளைச்சல் பெருகும்.

உடன் இருப்பவர் உழைப்பாளியா அல்லது சுகவாசியா, நேர்மையானவரா அல்லது போலியா, லாபத்தில் மட்டும் பங்கேற்பவரா அல்லது நஷ்டங்களிலும் உடன் இருப்பவரா, பிரச்னைகளைத் துணிவுடன் எதிர்கொள்பவரா அல்லது ஓடிவிடுபவரா போன்றவற்றைத் தெரிந்துகொள்ளவேண்டும். உங்கள்மீது அக்கறையும் அன்பும் கொண்டவராக அவர் இருப்பது நல்லது.

கவனம், ஒரு தொழிலைத் தொடங்குவதில் மட்டுமல்ல, இழுத்து மூடுவதிலும்கூட சட்டச் சிக்கல்கள் உள்ளன. தொடரவும் முடியாமல் மூடவும் முடியாமல் திரிசங்கு சொர்க்கத்தில் அகப்பட்டு செய்வதறியாது நிற்கும் நிலையைத் தடுக்கவேண்டும். ஒருவர் தங்களுடைய சொந்த லாப, நஷ்ட பிரச்னைகளால் சுய தொழிலிலிருந்து விலகினால், பலர் வேலையிழந்த தடுமாறுவார்கள் அல்லவா?

0

சிறு தொழில் ஒன்றை மேற்கொள்பவரை வட்டத்துக்குள் இருக்கும் ஒரு புள்ளியோடு ஒப்பிடலாம். முதலில் அவரால் ஒரு சிறு குழுவுக்கு (team of employees) வேலை வாய்ப்பு கிடைத்து பலன் பெறுகிறார்கள்.

அடுத்து, அவருடைய தொழிலுக்குத் தேவையான கருவிகளையோ உபரிப் பொருளையோ மூலப் பொருள்களையோ வழங்குபவர்கள் (suppliers) பலன் பெறுகிறார்கள். அவர்களுடைய வியாபாரம் வளர்ச்சி அடைகிறது. அடுத்த கட்டமாக, தொழில் செய்பவர் தான் உற்பத்தி செய்யும் பொருளையோ (finished products) அல்லது சேவையையோ (services) சமுதாயத்தின் முன் வைக்கின்றனர். பிறகு, அவற்றை நுகரும் வாடிக்கையாளர்கள் (customers) உருவாகிறார்கள். ஒரு குறிப்பிட்ட இடத்தில் தொழில் உருவாவதால், அந்த இடத்தைச் சுற்றி பல சிறிய பெரிய அனுகூலங்கள் உருவாகின்றன.

உதாரணமாக, சிறு தொழில் நடத்தும் இடத்துக்கு அடிக்கடி பொருள்கள் வந்து போக வேண்டிய நிலை இருந்தால், அந்தத் தொழிலதிபர் சாலைப் பிரச்னையைத் தீர்க்கவேண்டியவராக மாறிவிடுகிறார். தனது சுயலாபத்துக்காகவும் தொழில் முன்னேற்றத்துக்காகவும்தான் அவர் அவ்வாறு செய்கிறார் என்றாலும் அவருடைய சுயநலன் பொதுநலத்துக்கும் உகந்ததாக மாறிவிடுகிறது. அதே போல் அவர் செலுத்தும் வணிக வரி, வருமான வரி போன்றவை மூலம் அரசாங்கத்துக்கும் நாட்டுக்கும் வருமானம் பெருகுகிறது. நல்லப் பொருளாதார வளர்ச்சியும் ஏற்படுகிறது.

ஜெயிக்கலாம் தோழி / அத்தியாயம் 9

ஒரு நிறுவனத்திடமிருந்து வெளிவரும் பொருளோ சேவையோ தரமாக இருக்க வேண்டியது கட்டாயம். ஒரு மகிழ்ச்சியான திருப்தியடைந்த வாடிக்கையாளர் நம்மைப்பற்றிப் பிறரிடம் நல்லவிதமாகப் பேசாமல் போகலாம். ஆனால் அதிருப்தியான வாடிக்கையாளர் நமது நிறுவனத்தின் புகழை, குறைவான நேரத்தில் அதிக அளவில் சேதப்படுத்திவிட முடியும்.

வாடிக்கையாளர்களை இரண்டாகப் பிரிக்கலாம். தனிநபர், நிறுவனம். நம் வாடிக்கையாளர் ஒரு நிறுவனம் என்னும் பட்சத்தில் நாம் பல விஷயங்களில் கவனமாக இருக்கவேண்டும். நிறுவனத்தின் பாலிசி என்ன? நடத்துபவர்களின் இயல்புகள் என்ன? அவர்களுக்கு எது பிடிக்கும், எது பிடிக்காது? இவை அனைத்தையும் அறிந்து கொள்ள வேண்டியது மிக அவசியம். ஒவ்வொரு வாடிக்கையாளரின் அடிப்படைத் தன்மைகளை, தொழிலை நடத்துபவர் புரிந்து வைத்துக் கொள்ளுவது இன்றியமையாதது.

ஒவ்வொரு வாடிக்கையாளரையும் – genuine customer, reasonable customer, open customer, hidden customer, crooked customer, stable minded customer எனப் பலவகையாகப் பிரிக்கலாம். வாடிக்கையாளர் வெவ்வேறாக இருந்தாலும் அவர்கள் அனைவருமே, நாம் நடத்தும் நிறுவனத்துக்கு இன்றியமையாதவர்கள். அதேபோல் அனைவரையும் அனுசரித்துச் செல்ல வேண்டிய கட்டாயம் தொழில் முனைபவருக்கு உண்டு. அதேசமயம், தேவைக்கு அதிகமாக நம் நிறுவனத்திடமிருந்து பலவற்றை எதிர்பார்க்கும் வாடிக்கையாளர்களைத் திருப்தி செய்கிறேன் என்று சிக்கல்களை உருவாக்காமல் இருப்பது அவசியம். நிறுவனத்தோடு தொடர்புடைய ஒவ்வொரு வாடிக்கையாளருமே இன்றியமையாத நபராக இருந்தாலும், அவரால் நிறுவனத்துக்குக் கிடைக்கும் வியாபாரத்தின் அளவையும் கவனத்தில் கொள்ள வேண்டியது மிக அவசியம்.

அதே சமயம் நமக்கு விற்பனை செய்யும் நிறுவனங்களைப் பற்றியும் கவனத்தில் வைத்துக்கொள்ளுதல் இன்றியமையாதது. நமது உற்பத்திக்காக வாங்கப்படும் பொருள்களின் தரம், தன்மை, சிறப்பு ஆகியவற்றைக் கருத்தில் கொண்டு, வியாபாரத்தை விரிவாக்கவேண்டும். இதற்கு ஒவ்வொரு நிறுவனமும் தமக்குரிய வெண்டார் பாலிசி அல்லது சப்ளையர் பாலிசியை வரையறுத்துக் கொள்ளுதல் அவசியம். தர நிர்ணயம் மற்றும் நிர்வாகத்திறன் ஆகியவற்றை அடிப்படைக் கொள்கையாக வைத்துக் கொண்டு, ஒரு சீரிய கண்ணோட்டத்துடன் கொள்கையைத் தயாரித்துக் கொள்ளுதல் நலனைத்தரும்.

இந்த வரையறுக்கப்பட்ட திட்ட வரைவு அணுகுமுறை விற்பனையாளர்களிடமிருந்து நேரத்துக்கு கச்சாப் பொருள்கள் பெறுவதற்கும், அதனால் உரிய நேரத்தில் நமது நிறுவனத்தில் தயாரிக்கப்படும் பொருள்கள் காலதாமதமாகாமல் குறிப்பிட்ட நேரத்துக்கு வாடிக்கையாளர்களை அடையவும் வழி வகுக்கும்.

விற்பனையாளர்களிடம் திட்ட வரைவு செயல்முறை போல், வாங்கப்படும் உபரி மற்றும் கச்சாப் பொருள்களுக்கு விலை மதிப்பீடு ஆகியவற்றை முதலிலேயே பேசித் தீர்மானித்தல் மிக அவசியமாகும். குறிப்பிட்ட பொருளின் விலை ஏற்றம், சந்தை நிலவரம் ஆகியவற்றை அறிந்து கொண்டு, சப்ளையர்களுடன் கலந்தாலோசித்து திட்டமிடுதல் மிகவும் சிறந்த முறையாகும். இதனால், கட்டுக்கோப்பான செயல்முறைத் திட்டங்கள் நடைமுறையாக்கப்பட்டு விரைவான, தரமான மற்றும் கண்ணியமான உறவுமுறை சப்ளையர்களுக்கும் தொழில் முனைவோருக்கும் இடையே உருவாக வழி செய்யும்.

மேலும், தொழில் முனைவோர் தமது வாடிக்கையாளரிடமிருந்து எப்படி தாம் விற்பனை செய்யப்படும் பொருளின் வருவாயை எதிர்நோக்குகிறாரோ அதேபோன்று தமது சப்ளையரின் எண்ணத்தைக் கருத்தில் கொண்டு, அவரது பொருள்களுக்கான விலையை உரிய முறையில் காலதாமதமின்றித் தருவது மிக முக்கியமாகும். விற்பனையாளரின் திருப்தியும், நம்பிக்கையும்கூட நமது வாடிக்கையாளர்களின் மன நிறைவுக்குச் சமமானதே. இதனைக் கருத்தில் கொண்டு செயல்படுவதால் நிச்சயமாக தரமான மற்றும் கண்ணியமான உறவுமுறையை ஏற்படுத்த முடியும்.

தொழில் முனைவோர் சிறிய, குறுந்தொழில் நிறுவனமாகச் செயல்பட்டாலும் (Private, Partnership, Proprietor concern) தனது நிறுவனத்திடமிருந்து ஒரு குறிப்பிட்ட தொகையை, தனது மாத ஊதியமாக நிர்ணயித்து எடுத்துக் கொள்ளுதல் சிறந்தது. தொழில் தொடங்கி ஒரு வருட காலத்துக்குள் வருவாய் மற்றும் செலவினங்கள் சமன்நிலை அடைந்து, எதிர்பார்த்த லாபம் கிடைக்காமல் போகலாம். இதனால் பலர் தமது நிறுவனத்தின் வளர்ச்சியை முதன்மையாகக் கொண்டு, தனக்கென்று வருவாயை எடுத்துக்கொள்ள முயல்வதில்லை. இதனைத் தொடர்ந்து செய்வதால் சுயதொழில் முனைவோரின் சுய மதிப்பீட்டையும் தமது குடும்ப நபர்களின் ஆதரவையும் இழக்க நேரிடலாம். கடலில் போட்ட பெருங்காமாக அவரது மூலதனம் ஆகிவிடலாம். இதனைத் தவிர்க்கும் பொருட்டு, தொழில் தொடங்கிய கால கட்டத்திலேயே தனது வருவாயினை ஊதியமாகக் கருதி எடுத்துக் கொள்வது சிறந்தது.

தொழில் முனைபவர் தனது பலம், பலவீனம் இரண்டையும் கவனத்தில் கொள்ளவேண்டும். இவ்விரண்டு விஷயங்களை மேலோட்டமாகப் பார்க்காமல், தனி நபரின் குண நலன்கள், வருவாய், சக மனித ஆதரவு போன்ற அளவு கோல்களை வைத்து சீரிய முறையில் சுய ஆய்வு செய்வதால் பலவித இடையூறுகளை நேரிடையாக தைரியத்துடன் சந்திக்கலாம்.

தொழில் முனைபவர் எவராயினும் ஆணோ, பெண்ணோ தனது நடை உடை பாவனைகளை கவனத்தில் வைத்தல் நலம். தனது சுய வேலைவாய்ப்பினால் ஈட்டிய மரியாதையை கண்ணியமாகப் பாதுகாக்கும் பொருட்டு, அவரது ஆடை அணிகலன்களில் தனிக் கவனம் செலுத்துவது மிக அவசியம். தனி நபரின் தன்னம்பிக்கையினை வளர்க்கவும், சமூக மதிப்பில் உயரவும் அளிக்கவல்லதான இக்கருத்தினைப் பேணுவது மிகவும் அவசியமாகும். தொழில் முனைபவர் அநேக காலகட்டங்களில் பலரின் சந்திப்புகளையும், கூட்டங்களிலும் கலந்து கொள்ள வேண்டிய சூழ்நிலைகள் ஏற்படும். இத்தருணங்களில் வாடிக்கையாளரோ, விற்பனையாளர்களோ, சக தொழில் முனைவரோ ஒருவரின் நடை உடை பாவனையை வைத்து எடைபோடக்கூடிய வாய்ப்புகள் ஏற்படும். எனவே எக்காலக்கட்டங்களிலும் சுய தொழிலில் ஈடுபடுவோர் கண்ணியமாக உடை உடுத்தி, தனது வறுமை அல்லது இயலாமைகளின் சாயல் படியாத வண்ணம் பார்த்துக் கொள்வது மிகவும் அவசியம். அதற்காக படாடோபமாகவோ, தேவைக்கு அதிகமாகவோ உடைஉடுத்திக் கொள்ளுவதால் சமூகப் பார்வையில் மரியாதையினை இழக்க நேரிடும் அபாயமும் அதிகம்.

நிமிர்ந்த நன்னடை, நேர்கொண்ட பார்வை, பொருத்தமான ஆடை அணிகலன்கள், பேசும் திறன், தெளிவான சிந்தனை, சீரிய நோக்கம், நம்பகத்தன்மை ஆகியவை வெற்றி வாய்ப்பைப் பெறுக்கும்.

தொழில் முனைவோரின் நடத்தை, செயல்திறன் ஆகியவை சமூகப் பார்வையிலும், சக தொழில்முனைவோர் மத்தியிலும், அவரது வாடிக்கையாளர்கள் மற்றும் விற்பனையாளர்கள் மத்தியிலும், மிகவும் கூர்ந்து கவனிக்கப்படுவதால் ஒருவர் தனது திறமையின்மையையோ, பலவீனங்களையோ வெளிப்படுத்திக்கொள்ளக்கூடாது. இதில் கவனம் அவசியம்.

தனது தயாரிப்பில் உருவாகும் பொருளின் அடிப்படை விஷயங்களிலிருந்து, அதனைச் சார்ந்த தொழில் நுட்பம், வியாபார அணுகுமுறை முதலியவற்றைத் தெளிவாக அறிந்து வைத்திருப்பது தொழில் முனைவோரின் கடமையாகும். தற்போதைய அறிவியல் மற்றும் தொழில்நுட்ப வளர்ச்சியினைக் கருத்தில் கொண்டு, தனது நிறுவனம் உற்பத்தி செய்யும் பொருட்களுக்கான, பன்முக அறிவினை வளர்த்துக் கொள்ளுதல் அவசியம்.

செய்யும் தொழில் பற்றிய உயர்வான கருத்து உங்களுக்கு இருக்கவேண்டியது அவசியம். என் நிறுவனம் செழிப்படையப்போகிறது, வளரப்போகிறது, வெற்றிபெறபோகிறது என்று சிந்தித்து வரவேண்டும். இத்தகைய பாசிட்டிவ் அணுகுமுறை உளவியல் ரீதியில் நல்ல பலனைப் பெற்றுத்தரும். உங்கள் தன்னம்பிக்கையும் வளரும்.

நிறுவனத்தின் உற்பத்தித் திறனை வளர்க்க நினைத்தால், அதன் செயல்திறன், உற்பத்தி அளவு, தொழில்நுட்ப நிலை, வசதி வாய்ப்புகள் ஆகியவற்றைக் கணித்து வைத்துக்கொள்ளுதல் நல்லது. புதிய வாய்ப்புகள் அல்லது ஆணைகள் அதிக அளவில் கிடைக்கலாம். அப்போதும்கூட, தமது நிறுவனத்தின் செயல்பாட்டுத் திறன் (Production capacity), மனித வளம் (Manpower) ஆகியவற்றின் அடிப்படையில் புதிய உற்பத்தி ஆணைகளை (Production Order) வாங்குவது குறித்து முடிவுகள் எடுப்பது நல்லது.

இவ்வாறு செய்வதன்மூலம் வாடிக்கையாளர்களிடையே நம்பகத்தன்மையை உருவாக்கமுடியும். ஒரு புதிய ஆர்டரை ஒப்புக்கொள்வற்கு முன்னால் அது சாத்தியமா என்பதை முதலில் தெரிந்துகொள்ளுங்கள். வாடிக்கையாளரின் தேவையைப் பூர்த்தி செய்யமுடியுமா? ஒப்புக்கொண்ட தரத்தில் பொருளையோ சேவையையோ வழங்கமுடியுமா? இந்தக் கேள்விகளை உங்களுக்குள் நீங்கள் எழுப்பிக்கொள்ளாவிட்டால் வாடிக்கையாளர்களை நீங்கள் இழக்கவேண்டியிருக்கும்.

ஜெயிக்கலாம் தோழி / அத்தியாயம் 11

பொதுவாக இந்தியப் பெண்கள் தங்களுடைய உடல் அழகை, உடல் நலத்தைப் பேணிக் காப்பதில்லை. திருமணத்துக்கு முன்புவரை மட்டுமே தங்களைப் பற்றிப் பெரும்பாலும் கவலைப்படுகிறார்கள், அழகாக தங்களைக் காண்பித்துக் கொள்ளவும் பெருமுயற்சி எடுத்துக் கொள்கிறார்கள். இப்பொழுது நிலைமை பெரும்பாலும் மாறிக்கொண்டு வருகிறது என்று எடுத்துக்கொண்டாலும், இந்த மனோபாவம் மேல்தட்டு மக்களிடையேயும், உயர்மட்ட மத்திய தர பெண்களிடம் மட்டுமே நிலவுகிறது.

ஆண், பெண் கவர்ச்சியும், ஈடுபாடும் அக்காலத்திலும் இருந்தாலும், பெரும்பாலும் திருமணம் என்ற பந்தம் ஒரு கட்டுக்கோப்பான சமுதாய விதியாக காப்பாற்றப்பட்டு வந்தது. அதாவது சமூக மதிப்பீடுகள் உயர்வாகக் கருதப்பட்ட சமயம் அது. விதிமீறல்கள் அங்குமிங்கும் இருந்தாலும் மீறுபவர்கள் பெரும் விமரிசனத்திற்கு உள்ளானார்கள். சமூக அங்கீகரிப்பும் மறுக்கப்பட்டது. மேற்கூறிய காரணத்தால் பெண்கள் தங்கள் குடும்பம், குழந்தைகள், கணவன், உற்றார், உறவினர், வழிபாடுகள், பண்டிகைகள் என்று ஒரு வட்டத்துக்குள் தங்களின் கடமைகளை செவ்வனே நிறைவேற்றிக் கொண்டு இருந்தார்கள்.

பொருளாதார ரீதியாக குடும்பத்தின் பொறுப்புகள் பெரும்பாலும் ஆண்களால் கையாளப்பட்டு வந்தன. திறமையுள்ள பெண்கள், தங்கள் அறிவை, திறமையை எழுத்து, இசை, நடிப்பு, நாடகம் என்ற பொழுதுபோக்கு அம்சங்களில் வெளிப்படுத்தி சமூக அங்கீகாரம் பெற்றார்கள். திருமண பந்தம் அழுத்தமாக இருந்த காரணத்தால், விலகல்கள் அநேகமாக இல்லை. பெண் தன் இயலாமையை, வருத்தங்களை தனக்குள் புதைத்து ‘இது எனக்கு விதிக்கப்பட்ட வாழ்க்கை’ என்ற கோணத்தில் சகிப்புத்தன்மையுடன் எடுத்துக்கொண்டாள்.

ஆண்கள் பெண்கள்மீது ஆதிக்கம் செலுத்திவந்தபோதும், சமூக, குடும்பக் கடமைகளிலிருந்து பின்வாங்கவில்லை. பெண் சுதந்தரம், பெண்ணுரிமை என்றெல்லாம் சிலர் பேசிவந்தாலும் சமூகமாற்றம் எதுவும் பெரிய அளவில் ஏற்படவில்லை. பெண் தனக்கு வரையறுக்கப்பட்ட கோடுகளைத் தாண்டிச் செல்லவில்லை. தன் சுதந்தரம் கட்டுப்படுத்தப்பட்டது பற்றியும் தனது தனித்துவத்தை இழந்தது பற்றியும் பெரும் மனவருத்தம் அடையவில்லை.

காலம் மாற மாற, பொருளாதாரப் பிரச்னைகள் முன்னுக்கு வந்தன. முன்புபோல், குடும்பப் பொறுப்பை ஆண் ஒருவரே கவனித்துக்கொள்வது கடினமாக இருந்தது. இதனால் பெண்கள் கல்வி கற்பதும் வேலைக்குப் போவதும் அதிகரித்தன. பெண்களுக்குப் பொருளாதாரச் சுதந்தரம் கிடைத்தது. தங்கள் தனித்துவத்தைப் பற்றி நினைக்கத் தொடங்கினர். நான், எனது அறிவு, எனது கருத்து, எனது உணர்வு, எனது நிலை என்று சிந்தனையை மேம்படுத்தத் தொடங்கினர். பெண் தியாகம் செய்பவள், வீட்டில் அடங்கி கிடப்பவள், அதிகாரம் அற்றவள் என்ற நிலை மாறத் தொடங்கியது. எந்த ஒரு சமூக மாற்றத்துக்கும் பொருளாதாரம் அடிப்படையாக இருக்கும் என்பதற்கு இது ஒரு முக்கிய உதாரணம்.

நம் நாட்டில் பல்வேறு நம்பிக்கைகள், சமூக நியதிகள், சமூக விதிகள் ஆகியவை பின்பற்றப்படுகின்றன. எழுதப்படாத சமூகச் சட்டங்களாக இவை பின்பற்றப்படுகின்றன. பிற்போக்குத்தனமானவற்றை ஒதுக்கிவைத்துவிட்டு பொதுவாக அணுகினால் இந்த சமூக அமைப்புகள் நம்மை மேற்கத்திய கலாசாரங்களில் இருந்து காப்பாற்றியிருக்கின்றன என்றுதான் சொல்லவேண்டும். இந்தியக் குடும்ப அமைப்பு மேற்கத்திய பாணியிலான அமைப்பில் இருந்து பெரிதும் வேறுபடுவதற்குக் காரணம் நம் சமூக, கலாசார, வரலாற்று அடித்தளம்.

சமூக மதிப்பை, விதியை ஒரு ஆண் மீறும்போது தனிப்பட்ட முறையில் அவன் பாதிக்கப்படுகிறான். ஒரு பெண் மீறும்போது குடும்ப அமைப்பு குலைகிறது. குடிகாரத் தலைவன், கொலைக்காரத் தலைவன், பொறுப்பற்ற கணவன் என்ற எத்தகைய மோசமான நிலையை ஆண் எடுத்தாலும், அந்தக் குடும்பத் தலைவி அதைச் சமன் செய்யும் திறமைசாலியாக, உழைப்பாளியாக இருக்கும் பட்சத்தில், அக்குடும்பத்தின் பாதிப்புகள் நீக்கப்பட்டு குழந்தைகளின் எதிர்காலம் ஓரளவுக்கு நல்ல முறையில் அமைந்து விடுகிறது. இதிலிருந்து நாம் தெரிந்து கொள்வது என்னவென்றால் பெண் தவறும்போது, பெண் செயல்படாமல் இருக்கும்போது, மிக மோசமான விளைவுகளை அக்குடும்பத்தினருக்கு ஏற்படுத்தி விடுகிறாள். இவ்வகையில் ஆவதும் பெண்ணாலே, அழிவதும் பெண்ணாலே என்ற கூற்று உண்மையென்றே கூறலாம். ஆக்கக் கற்றுக் கொடுத்து விட்டால் பெண்களை அழிவிலிருந்து காப்பாற்றி விடமுடியும். பெண்களைக் காப்பாற்றுவதன் மூலம் ஒரு சமூக அமைப்பை, நாட்டின் பாரம்பரியத்தைக் காப்பாற்றிவிட முடியும்.

பொருளாதாரத் தேவைகளுக்காக பெரும்பாலான பெண்கள் வேலைக்குப் போகத் தொடங்கினாலும், இன்றும் வசதியுள்ள பல பெண்களும் வேலைக்குச் செல்ல இவர்களோடு போட்டி போடுகின்றனர். அதாவது பணம் ஈட்டவேண்டிய கட்டாயமுள்ள பெண்கள் ஒருபுறம்; அந்தக் கட்டாயமில்லாத பெண்கள் மறுபுறம். பொதுவாக, இருபதிலிருந்து நாற்பது வயது வரையிலான பெண்கள் அனைவரும் பொருளாதார ரீதியில் தன்னைச் சுயமாக நிலைநிறுத்திக்கொள்ள விரும்புகிறார்கள். இது சமீப காலத்தில் ஏற்பட்டுள்ள மிக முக்கியமான சமூக மாற்றம்.

பொருளாதார சுதந்தரம் உள்ள பெண்கள் சில விஷயங்களை மனதில் கொள்ள வேண்டியது மிக அவசியம். பொருளாதார சுதந்தரத்துக்கும் பலத்துக்கும் அடிப்படையாக அமைவது பணம். அந்தப் பணத்தை சுயக் கட்டுப்பாடு இன்றி, திட்டமிடுதல் இன்றி செலவு செய்வது அறிவீனம். வேலைக்குச் செல்லும் மணமான பெண்கள் பலர் இதனை உணர்வதில்லை. கையில் பணம் புழங்கத் தொடங்கியதும், போதுமான சம்பளம்தான் வருகிறதே என்ற நினைப்பில் தாறுமாறாகச் செலவு செய்துவிடுகிறார்கள். சேமிக்கும் வழக்கத்தை மறந்துவிடுகிறார்கள். போதாதற்கு, கடனையும் வாங்கிவிடுகிறார்கள். எல்லாம் மாதச் சம்பளம் கொடுக்கும் துணிச்சல்! ஆக, வேலையில் தொடர்ந்து நீடிக்கவேண்டும் என்ற கட்டாயத்தைத் தம்மைச் சுற்றி உருவாக்கிக் கொள்கின்றனர்.

கற்பகம் திருமணமாகி கூட்டுக் குடும்பத்தில் வாழ்ந்து கொண்டிருப்பவர். தான் சம்பாதிப்பதில் அதீத பெருமையும் கர்வமும் கொண்டவர். மற்றவர்களைத் துச்சமாக எடை போடுபவர். பொருளாதார ரீதியாக தன்னுடைய பிறந்த வீட்டு மனிதர்களுக்கு, கணவருக்குத் தெரியாமல் பல உதவிகள் செய்தவர். ஆனால் அவருக்கே ஒரு தேவை என்று வந்தபோது செய்வதறியாது நின்றுவிட்டார்.

இத்தகைய பெண்களின் குணாதிசயங்களைப் பொருளாதாரப் பின்னணியில் அலசிப் பார்க்கும்போது சில விஷயங்கள் தெரியவருகின்றன. இவர்களுக்குப் பொருளாதார சுதந்தரம் இருக்கிறது. பணம் ஈட்டும் திறன் இருக்கிறது. தகுதி இருக்கிறது. ஆர்வம் இருக்கிறது. என்றாலும், சம்பாதித்த பணம் கையில் தங்கவில்லை. மன அமைதியைக் கொடுக்கவில்லை. இவர்களுக்கும் காலையில் எழுந்து கடமையைச் செய்து ஒன்பது மணிக்கு கையசைத்துக் கணவனை அலுவலகத்துக்கு அனுப்பிவிட்டு, ஒன்றாம் தேதியன்று கணவனின் சம்பளக் கவரை ஆவலுடன் எதிர்பார்க்கும் பெண்களுக்கும் பெரிய வித்தியாசமில்லை என்பதுதான் உண்மை.

வேலைக்குச் செல்லும் பெண்கள் கடன் இன்னி நிறைவான வாழ்க்கை வாழவேண்டும். அதற்கு சேமிப்பு அவசியம். உறுதியான முதலீடு அவசியம். இதையெல்லாம் செய்தால்தான் அவர்கள் ஓடியாடி பொருள் ஈட்டியதற்கு ஒரு மதிப்பு இருக்கும். பெண்கள் தங்களுடைய பொருளாதார சுதந்தரத்தை தங்கள் மகிழ்ச்சிக்கும் குடும்பத்தினரின் மகிழ்ச்சிக்கும் வளர்ச்சிக்கும் பயன்படுத்தவேண்டும்.

நமது திரைப்படங்கள் அன்று தொடங்கி இன்று வரை, பெண்களைச் சரியான கோணத்தில் சித்தரிக்கத் தவறிவிட்டது. படித்த, சம்பாதிக்கும் பெண்கள் திமிர் படைத்தவர்களாகவும், குடும்பத்துக்குக் கட்டுப்படாதவர்களாகவும் காண்பிக்கப்படுகிறார்கள். உண்மையில் பெண்கள் இப்படியா இருக்கிறார்கள்? படித்த, வேலைப் பார்க்கும், சுயத்தொழில் செய்யும் எத்தனையோ பெண்கள், வெற்றிகரமான குடும்பத் தலைவியாகத் திகழ்கிறார்கள். வீட்டில் இருக்கும் பெண்களைக் காட்டிலும் வீட்டுக்கு இவர்கள் அதிகம் பங்களிக்கிறார்கள்.

ஜெயிக்கலாம் தோழி / அத்தியாயம் 13

சிறு தொழில் பலருடைய கனவாகவும் விருப்பமாகவும் இருந்தாலும் ஒரு சிலருக்கே அது கைகூடுகிறது. தவிர்க்கவியலாதபடி ஓர் அடிப்படை கேள்விக்கு இது நம்மை இட்டுச் செல்கிறது. யார் தொடங்கினால் சுய தொழில் துலங்கும்?

ஒவ்வொருவருடைய குணாதிசயங்களைப் பொருத்தே அவருடைய வெற்றி, தோல்விகள் தீர்மானிக்கப்படுகின்றன. எனவே நீங்கள் எப்படிப்பட்டவர் என்பது தெரிந்தால்தான் உங்களால் தொழில்முனைவோராக இயலுமா என்பதைச் சொல்லமுடியும்.

கீழ்வரும் கேள்விகளுக்கு ஆமாம், இல்லை என்று நேர்மையாகப் பதிலளிக்கவும்.

1. தனிப்பட்ட முறையில் நீங்கள் எந்தவொரு செயலைச் செய்தாலும் அதனைச் சிறப்பாகச் செய்ய வேண்டுமென்ற எண்ணம் கொண்டவரா? குறைந்தது, மிக முக்கியமான விஷயங்களையாவது திறம்படச் செய்ய முயற்சிக்கும் நபரா?

2. தவறுகள் நேர்ந்தால், அமைதியாக சிறிது அது குறித்து சுய பரிசோதனையில் ஈடுபடுபவரா?

3. பொருளாதார முன்னேற்றம், பண வரவு இவை இரண்டையும் பிரதானமாக சிந்தனை செய்பவரா?

4.சுற்றியுள்ள மனிதர்களின் குணநலன்களை குறைந்தபட்சம் உங்களுக்குள்ளாவது நேர்மையாக விமரிசிக்கவும் புரிந்துகொள்ளவும் முயற்சி செய்பவரா?

5. பொதுவாக உடல்நலனில் சராசரி அக்கறையாவது செலுத்துபவரா அல்லது உடல்நலப் பாதிப்புக்கள் ஏற்படும்பொழுது வாழ்க்கையின் முடிவுபற்றிச் சிந்திப்பவரா?

6. கையில் புரளும் பணம், கொடுக்கல் வாங்கல் போன்றவற்றில் ஓரளவுக்காவது தெளிவான கண்ணோட்டம் கொண்டிருப்பவரா?

7. ஒரு செயலில் ஈடுபடும்போது, தடைகள் ஏற்படும்போது அதை வெல்வதற்கு பல வழிகளிலும் முயற்சி செய்பவரா?

8. சவாலான தருணங்களில் கழிவிரக்கம் கொள்ளாமல், அதைத் தடுக்கும் வழிமுறைகளை அறிந்து வைத்திருப்பவரா?

9. குடும்ப உறவுகளை நேர்மையுடன் மதிக்கத் தெரிந்தவரா? ஆரோக்கியமான கருத்து பரிமாற்றம் செய்பவரா?

பல கேள்விகளை இப்படி அடுக்கமுடியும் என்றாலும் மேலே உள்ளவை ஒரு நுணுக்கமான அளவுகோல். சுயமாக யார் உதவியையும் எதிர்பார்க்காமல் வாழவேண்டும் என்ற நோக்கம் கொண்டவராக நீங்கள் இருந்தால் சுயதொழில் உங்களுக்கானது.

சுயதொழில் என்பது அம்பானியும் நாராயண மூர்த்தியும் லட்சுமி மிட்டல்களும் மட்டுமே மேற்கொள்ளவேண்டிய முயற்சி அல்ல. சிறு புள்ளியில் தொடங்கியே இவர்கள் பெரும் வெற்றிகளை ஈட்டியிருக்கிறார்கள்.

தற்கால சினிமாக்களை இதற்கு உதாரணமாகக் கொள்ளலாம். மிக பிரமாண்டமாக பல கோடிகள் செலவழித்து எடுத்த பெரிய பட்ஜெட் திரைப்படங்கள் தயாரிப்பாளருக்கு அதிகபட்ச லாபத்தை எல்லா நேரமும் பெற்றுத் தந்ததில்லை. அதே சமயம் குறைந்தபட்சம் படங்கள், சின்னத் தயாரிப்பாளர்கள் ஈடுபடும் திரைப்படங்கள் வெற்றிப்பெற்று அவர்களுக்கு லாபத்தை ஈட்டிக்கொடுத்துள்ளன.

பிரம்மாண்ட வெற்றிகள் தொழிலில் தொடர்ந்து ஏற்படும் என்று எதிர்பார்க்கமுடியாது. அது உலகளவில் ஒரு சிலருக்கே சாத்தியப்படலாம். அதிகம் பேசப்படாத சிறு தொழில் நிறுவனங்கள் தொடர்ந்து கணிசமாக லாபம் கொடுத்துக்கொண்டிருக்கும். உயிர்ப்புடன் இயங்கிகொண்டிருக்கும். ஆக, தொழில்முனைவோருக்கான தங்க விதி இதுதான். நீங்கள் ஈடுபடும் தொழிலமைப்பு உங்களுக்கு தொடர்ந்து அதை நடத்தக்கூடிய சூழ்நிலையை உருவாக்கிக் கொண்டே இருக்குமானால், நீங்கள் அந்த தொழிலை திறம்பட நடத்துகிறீர்கள் என்று பொருள்.

குறுந்தொழில்களும் சிறுதொழில்களும் இந்தியப் பொருளாதாரத்துக்கு பெருமளவில் வலிமை சேர்க்கிறது என்பது நிதர்சனமான உண்மை. இந்த உண்மை, பல தனிப்பட்ட மனிதர்கள் தங்கள் எல்லைக்குட்பட்டு, வியாபார உத்திகளை திறம்பட கையாண்டு செயல்படுவதன் மூலமே சாத்தியமாயிற்று.

பெரிதாகச் செய்யவேண்டும் என்று கற்பனையில் ஆழ்ந்து, பின்னர் இயலாமையை உணர்ந்து விலகியிருப்பதைக் காட்டிலும், தன் திறனுக்கேற்ற ஒன்றை தேர்ந்தெடுத்து அந்த வட்டத்துக்குள் தொடர்ந்து சலிக்காமல் இயங்கிகொண்டிருந்தால் உங்களால் ஒரு தொழிலதிபராக மாறமுடியும்.

இன்றைய காலகட்டத்தில் பத்து வருடங்களுக்கு மேல் ஒரு தொழில் நிறுவனத்தை நடத்தினால், அந்த நிறுவனத்தின் பெயரை மக்கள் மனத்தில் பதிய வைத்தால், வெற்றி நிச்சயம் சாத்தியமாகும்.

மற்றபடி மீடியாவின் வெளிச்சம் கிடைக்காமல் இருப்பதோ, வெளியுலகுக்குப் பெரிய முறையில் அறிமுகமாகாமல் இருப்பதோ அவ்வளவு முக்கியமல்ல. தேவை தொடர்ச்சியான நீடித்த வெற்றி மட்டுமே. அது சாத்தியப்பட்டால், அதைத் தொடர்ந்து அளிக்கமுயன்றால் அதுவே பெரிய வெற்றிதான். பெரிய அளவிலான முதலீடும் பெரிய அளவிலான லாபங்களும் மட்டும்தான் உன்னதமானவை என்று அர்த்தப்படுத்திக்கொள்ளவேண்டும்.

சுயதொழிலில் வெற்றிபெறுவதற்கு நிகழ்காலத்திலும் எதிர்காலத்திலும் என்னென்னத் திறமைகளை வளர்த்துக் கொள்ளவேண்டும்?

1. கல்வியில் தங்க மெடல்கள் வாங்கவேண்டும் என்று அவசியமில்லை. ஆனால், சராசரி கல்வியும் கல்வியில் ஆர்வமும் அவசியம்.

2. நம்முடைய மெக்காலே கல்வித் திட்டங்கள் பெருமளவு தொழில் முயற்சிக்கு உறுதுனையாக இல்லையென்றாலும், நமது கல்வியும், சில அம்சங்களில் அதன் மூலம் நாம் பெறும் பொதுஅறிவும் அடிப்படை அறிவை அளிக்கின்றன. எனவே கல்வி அவசியம். கல்வித் தகுதிகளை வளர்த்துக் கொள்ள அதிகபட்ச முயற்சிகள் மேற்கொள்வதும் அவசியம். வாழும் சூழ்நிலைக்கேற்ப சுற்றியுள்ள சமூகத்துக்கு ஒப்பான தொழில்களைத் தேர்ந்தெடுக்கலாம்.
ஓர் உதாரணம் பார்க்கலாம். காபி குடிக்கும் பழக்கமுள்ள சுமார் 100 குடும்பங்கள் உங்களைச் சுற்றி இருப்பதாக கற்பனை செய்துகொள்வோம். இரண்டு, மூன்று கிமீ தொலைவில் காபி அரைக்கும் இயந்திரம் இல்லையென்றால், இதுதான் அந்தச் சூழலுக்கு ஏற்ற சரியான தொழில்.

ஒரு சிறிய இடத்தை வாடகைக்கு எடுத்து பெரிய காபி நிறுவனங்களின் கிளைகளாகச் செயல்பட்டு வாடிக்கையாளர்களைக் கவரலாம். அல்லது காபிக் கொட்டைகளின் தன்மை, திறன், கிடைக்கும் இடம் மற்றும் விவரங்கள் அறிந்து அதனை கொள்முதல் செய்து, அரைக்கும் இயந்திரத்தை நிறுவலாம். சூழலையும் தேவையையும் ஆராய்ந்து தொடங்கப்பட்ட தொழில் முயற்சி என்பதால் நிச்சயம் பலன் கிடைக்கும். சீராகவும் தரமாகவும் தொடர்ந்து செயல்பட்டு வந்தால் ஒரு வாடிக்கையாளர் கூட்டத்தை உங்களுக்கென்று உருவாக்கிக்கொள்ளலாம்.

இது ஓர் உதாரணம் மட்டுமே. இப்படிப் பல வாய்ப்புகளை உருவாக்கிக்கொள்ளமுடியும். எந்தப் பொருள் அல்லது சேவை நம் சுற்றுப்புறத்தில் கிடைக்கவில்லை என்பதை ஆராய்ந்து அறிந்து அதைத் தொழில் முயற்சியாக மாற்றும் திறன் இருக்கவேண்டும். இப்படித்தான் ஒரு சிறு தொழில் தொடங்கப்படவேண்டும். இப்படித்தான் தொழில் அதிபர்கள் உருவாகிறார்கள்.

ஜெயிக்கலாம் தோழி / அத்தியாயம் 15

சிறிய முதலீட்டில் தொழில் தொடங்குவதற்கு சில முக்கியத் துறைகளை எடுத்துக்கொள்வோம். விலைவாசி உயர்வு காரணமாக இப்போது குடும்பத்தில் கணவன் மனைவி இருவருமே வேலைக்குப் போகும் கட்டாயத்தில் உள்ளனர். குழந்தைகளைக் கவனித்துக்கொள்ள நம்பகமான ஆள்கள் கிடைக்காமல் பலர் திண்டாடிக்கொண்டிருக்கிறார்கள். இத்தகைய சூழலில் குறைந்த முதலீட்டில் எளிய சுகாதாரத்தோடு கூடிய க்ரீச் எனப்படும் குழந்தை காப்பகங்களை உருவாக்குவது பெண்களுக்கு ஏற்ற ஒரு தொழிலாக இருக்கும்.

பாலர் பள்ளிகளை நிறுவுவதற்கு தாயுள்ளம் இருந்தால் போதுமானது. அதிகம் படித்திருக்கவேண்டும் என்று அவசியமில்லை. குழந்தைகளின் இயல்புகளை அறிந்து கொண்டு தங்கள் பள்ளிகளை இருந்த இடத்திலேயே நடத்தி வந்தால் அந்தப் பகுதியிலுள்ள வேலைக்குப் போகும் பெண்களுக்கு அது வரப்பிரசாதமாக அமையும்.

கணிதம், அறிவியல் அல்லது கணினி சார்ந்த கல்வியில் தனித்திறமைப் பெற்றவர்களாக இருந்தால் ட்யூஷன் சென்டர் எனப்படும் தனிப்பயிற்சி மையங்களை ஆரம்பிக்கலாம். இதற்கான தேவையும் நமது நாட்டில் அதிகரித்துக்கொண்டே வருகிறது.

போட்டிகள் நிறைந்த வியாபார உலகில் பள்ளி மற்றும் கல்லூரிகளில் கற்பது மட்டுமல்லாமல் அதற்கும் மேலே தனிப்பட்ட கவனமும் தேவைப்படுகிறது. பயிற்சி மையங்களில் திறமையுள்ள பெண்கள் தாங்களே வகுப்புகளை எடுக்கலாம். அதைத் தவிர, தங்களுக்கு தெரிந்த நண்பர்களைத் தேர்ந்தெடுத்து தங்கள் வகுப்புகளுக்கு பாடம் எடுப்பதற்கு ஏற்பாடு செய்து கொள்ளலாம்.

கணினி சார்ந்த தொழில்களில் நல்ல வாய்ப்புகள் உள்ளன. பெரிய நிறுவனமாக ஏற்படுத்தி தொழில் தொடங்க முடியாதவர்கள், நவீனமயமான அறிவுச் சார்ந்த தனிநபர் திறமையை அடிப்படையாகக் கொண்ட கீழ்கண்ட தொழில்களை மேற்கொள்ளலாம்.

E-learning எனப்படும் virtual tuition centre இன்று பெருகிக்கொண்டிருக்கிறது. உலகளவில் கணிதத்தை நல்ல முறையில் போதிப்பதற்கு மிகச் சிலரே உள்ளனர். கணிதத்தில் மேற்படிப்பு படித்த பெண்கள் குறைந்தபட்ச முதலீட்டில் வீட்டிலிருந்து கொண்டே சில கணிணிகளை வைத்துக்கொண்டு உலகளாவிய அளவில் கற்றுக்கொடுக்கலாம். பள்ளி, கல்லூரிகளில் கணிதத்தை நல்ல முறையில் கற்றுக் கொடுப்பதற்கு திறமையான ஆசிரியர்கள் கிடைப்பது அரிதாக உள்ளது. இந்நிலையில் எதிர்காலத்தில் பல பள்ளிகளும் கல்லூரிகளும் மேல்நாடுகளைப் போல் வீடியோ கான்ஃபரன்ஸிங் மூலம் ஆசிரியர்களைப் பணிக்கு அமர்த்தலாம். இது போன்ற சமயங்களில் வீட்டிலிருந்தபடியே பல்வேறு பள்ளிகளுக்கும் கல்லூரிகளுக்கும் வகுப்புகள் எடுக்கும் வாய்ப்பும் நல்ல வருமானமும் கிடைக்கும்.

வணிகவியலில் முதுகலைப்பட்டம் பெற்ற பெண்கள் ஒன்று கம்ப்யூட்டரில் அக்கவுண்டிங் மென்பொருள் பேக்கேஜ்கள் நிறுவி கடைகள் மற்றும் சிறிய அலுவலகங்களில் நடக்கும் வியாபாரத்தில் வரவு, செலவு திட்ட அறிக்கைகள் தயாரிக்லாம். வணிகவரி, சுங்கவரி, வருமான வரி, சேவை வரி, என பலதரப்பட்ட வரிச்சேவைகளின் தன்மைகளை உணர்ந்து அவ்வப்பொழுது மாறும் சட்டங்களையும் அறிந்துகொண்டு, இந்த சிறு வணிகர்களின் கணக்கு வழக்குகளை வீட்டிலிருந்தபடியே மேற்கொள்ளலாம். வரி செலுத்துவதற்கும் உதவி செய்யலாம்.

மக்களின் ரசனைகள் பெருமளவில் மாறிக் கொண்டு வரும் இன்றைய சூழலில் விலைவாசிகள் எவ்வளவு உயர்ந்த போதும், உணவு விடுதிகளில் கூட்டம் குறைவதேயில்லை. இன்றியமையாத தொழில்களில் உணவு சார்ந்த தொழில்கள் மிக முக்கியப் பங்கு வகிக்கின்றன. கையேந்தி பவனிலிருந்து நட்சத்திர அந்தஸ்துடைய ஹோட்டல்கள் வரை, எல்லாவற்றுக்கும் அதற்கென்று உரிய வாடிக்கையாளர் கூட்டம் இருக்கிறது. இத்துறையில் சிறு தொழில்களுக்கான சந்தர்ப்பங்கள் என்னவென்பதை சிறிது பார்ப்போம்.

என்னதான் நவீன உபகரணங்கள் சுற்றியிருந்தாலும், சமையல் என்பது பெரும்பாலான பெண்களுக்கு ஒரு சுமையாகவே இருக்கிறது. இன்னும் நம் நாட்டில் சமையலறை என்பது பெண் தொடர்புடைய ஓர் இடமாகவே கருதப்படுகிறது.

சமையல் கலையில் விருப்பமுள்ள திறமையுள்ள பெண்கள், சிறு சிறு உணவு விடுதிகளை சுகாதாரத்துடன் ஏற்படுத்தி, தினசரி காலை மதியம் இரவு உணவு வகைகளைச் சமைத்துக் கொடுத்து, அதை தேவைப்படுவோருக்கு டெலிவரி செய்தால் நல்ல வருமானம் கிடைக்கும். இரு சக்கர வாகனங்களை ஓட்டத்தெரிந்த பெண்கள் தாங்களே டெலிவரியும் செய்யலாம். பிறகு அதற்கென ஆள்களை நியமித்துக் கொள்ளலாம்.

சமீபத்தில் காய்ச்சலால் மூன்று நாள்கள் வீட்டில் முடங்கி கிடக்கும் சூழ்நிலை எனக்கு ஏற்பட்டது. அந்த தருணங்களில் எழுந்து சமையல் செய்வதற்கு உடல்நலம் இடம்கொடுக்கவில்லை. அதே சமையத்தில் மருத்துவர் கொடுத்த மூன்று நான்கு மாத்திரைகளை விழுங்க வேண்டிய கட்டாயமும் இருந்தது. எப்பொழுதும் பணி நிமித்தமாக வேலையில் ஈடுபடும் என்னைப் போன்ற தொழிலதிபர்களால், வீட்டில் முடங்கி கிடப்பது சிரமமானது. அப்போது தொலைபேசியிலும் அலைபேசியிலும் பேசிய பலரும், குறிப்பாக பெண்களும் நான் சொல்ல வந்த கருத்தை வலியுறுத்தினர்.

பொதுவாக காய்ச்சலின் போது உட்கொள்ளக்கூடிய உணவு வகைகளான கஞ்சி வகைகள் ரசவகைகள் மற்றும், சூப், சட்னி வகைகள் ஆகியவற்றைப் பிரத்தியேகமாக யாராவது செய்து கொடுத்தால் எவ்வளவு நன்றாக இருக்கும்! காய்ச்சல் என்பது குறைந்தபட்சம் 3 அல்லது 4 நாள்கள் நீடிக்கக்கூடியது. அவர்களிடம் உங்கள் தொலைபேசி எண் இருந்தால் உங்களால் வேண்டியதைக் கொடுத்து உதவமுடியும் அல்லவா? மூலிகை கஷாயங்களையும்கூட நல்ல முறையில் தயார் செய்து உணவோடு கொடுத்தனுப்பலாம்.

வீட்டிலுள்ள பல முதியோர்கள் பாட்டி வைத்தியம் என்று சொல்லப்படும் இயற்கை மருத்துவத்தில் அனுபவம் கொண்டிருப்பார்கள். இவர்கள் துணையுடன் பல சுவையான, சத்தான உணவு வகைகளை அறிமுகப்படுத்தலாம்.

இன்று பெரும் நகரங்களில் வேலை மாற்றம் மற்றும் கல்வி நிமித்தம் தங்கள் ஊர்களிலிருந்து வெளியூர்களில் அதிக நபர்கள் வாழ்கின்றனர். இவர்களைப் போன்றவர்களுக்கு உடல் அசௌகரியங்கள் ஏற்படும்போது, மேற்கூறிய பொருள்களின் தேவை மிக உதவியாக இருக்கும். அதேபோல் இன்னும் பழமையான உணவுப்பண்டங்களான கைப்பிடி சேவை, கொழுக்கட்டைகள், போளிகள் போன்ற எத்தனையோ வகை தின்பண்டங்கள் மக்களுக்கு தேவைப்படும். அதே சமயத்தில் தரமான தின்பண்டங்கள் கிடைக்காமலும் இருக்கின்றன. இத்தகைய சூழலில் இதைப்போன்ற பண்டிகை சார்ந்த தின்பண்டங்களைத் தயார் செய்யத் திறமையான பெண்கள் முன்வந்து, அதை வீட்டு விநியோகமும் செய்ய முடிந்தால் இதுவும் ஒரு நல்ல தொழிலாக அமையும் என்பதில் சந்தேகமில்லை.

இன்றைய இளைய தலைமுறையினர் உடல் நலம் பேணிக்காப்பதில் அதிக அக்கறை எடுத்துக் கொள்கின்றனர். இவர்களுக்கு சாலட் வகைகளை அறிமுகப்படுத்தலாம். ஊறுகாய்கள், பொடிகள் போன்றவற்றைத் தயாரிப்பதிலும் ஈடுபடலாம். பெரிய நிறுவனங்கள் பல இன்றளவும் தங்களுடைய பண்டங்களை இப்படிப்பட்ட குறுவணிகர்களிடம் இருந்தே கொள்முதல் செய்கின்றனர்.

பதப்படுத்தும் உணவு வகைகளின் பயன்பாடு இன்னும் நம் நாட்டில் வளர்ந்துவரும் ஒரு துறையாகவே உள்ளது. அயல் நாடுகளைப் போல் பிரஸஸ்ட் ஃபுட் வகைகள் நம் நாட்டில் குறைவு என்றாலும் வளர்ந்து வரும் சமுதாயச் சூழலில் இதற்கான தேவை நிச்சயம் எழும். உணவு பதப்படுத்தும் தொழில்நுட்பத்தைக் கற்று வேண்டிய உபகரணங்களை வாங்கி தொழில் தொடங்கலாம்.

ஜெயிக்கலாம் தோழி / அத்தியாயம் 17

எலக்ட்ரானிகல் துறையில் ஆர்வமுள்ள நபர்களுக்கு சந்தையிலிருக்கும் சில வாய்ப்புகளை காண்போம். சில்லறை அங்காடிகளாகட்டும், பொருள்களைச் சேமித்து வைக்கும் கிடங்குகளாகட்டும், பார்க்கிங் லாட் எனப்படும் வாகனங்களை நிறுத்துமிடத்தை நிர்வகிக்கும் இடங்களாகட்டும், போக்குவரத்து அலுவல்களாகட்டும் – அனைத்து இடங்களிலும் கோட் முறையில் தகவல்கள் பதிவு செய்யப்படுகின்றன. இங்கெல்லாம் பிரிண்டர்களோடு ஒருங்கிணைக்கப்பட்ட மொபைல் பில்லிங் மிஷின் பயன்படுத்தப்பட்டு வருகிறது. இந்த மொபைல் பிரிண்டர் மூலம் எளிமையாக ரசீதுகள் அளிக்கமுடியும். டிக்கெட் கவுண்டர், பெட்ரோல் பங்க், ஷாப்பிங் மால் என்று பல இடங்களில் இதை நீங்கள் பார்த்திருப்பீர்கள்.

அந்தந்த துறைக்கு ஏற்றவாறு வடிவமைக்கப்பட்ட இத்தகைய இயந்திரங்கள் 5000 முதல் 10,000 ரூபாய் வரை சந்தையில் கிடைக்கின்றன. இவற்றைப் பராமரிக்க ஆண்டுக்கு 1000 முதல் 1500 வரை செலவாகும். இத்துறையில் ஈடுபட்டிருக்கும் நிறுவனங்கள் இதற்கு நல்லதொரு சந்தை இருப்பதை உறுதி செய்கின்றனர். உள்நாட்டு வங்கிகளும் இத்தகைய இயந்திரங்களை உபயோகப்படுத்தத் தொடங்கி விட்டன.

வாடிக்கையாளரே எளிதாக இவற்றை கையாள முடியும். இத்தகைய மொபைல் பிரிண்டிங் இயந்திரங்களின் தேவை பல கோடிகளைத் தொடும் என்பது வல்லுனர்களின் கணிப்பு. இத்தகைய இயந்திரங்கள் வைரஸால் பாதிக்கப்படுவதில்லை. இயக்குவதற்கு தொழில்நுட்பம் தெரிந்தவர்களின் தேவையும் இல்லை. இவற்றை உற்பத்தி செய்ய முடியுமானால் அது நல்லதொரு தொழிலாக இருக்கும். அல்லது, வெளிநாடுகளிலிருந்து முழுமையாகவோ, அதன் உதிரிப்பாகங்களையோ இயக்குமதி செய்து, ஒன்றாக இணைத்து விற்பனை செய்ய முன் வந்தால் நல்ல எதிர்காலம் உண்டு.

ராகவபாய் ப்ரஜாபதி என்பவர் மண்பாண்டம் செய்யும் தொழிலில் ஈடுபடுபவர். குஜராத் பூகம்பத்தால் சுற்று வட்டாரமே மண்ணோடு மண்ணாகி வாழ்விழந்த சூழலில் குறைந்த விலையில் ஏழைகளுக்கான குளிர்சாதனப் பெட்டியை இவர் உருவாக்கினார். இயற்கை களிமண்ணால் ஆன இந்த குளிர்சாதனப் பெட்டி வேலை செய்வதற்கு மின்சாரம் தேவையில்லை என்பது முதன்மையான விஷயம். காய்கனிகளை சுமார் 5அல்லது 6 நாள்கள் வரை கெடாமல் காக்கக்கூடியது இது. பால் மூன்று நாள்கள் வரை கெடாமல் இருக்கும். பலவிதமான குளிரூட்டும் பெட்டிகளை ஆராய்ந்து பார்த்து 3 ஆண்டுகள் செலவழித்து இதை அவர் வடிவமைத்தார்.

மின்சார சிக்கனத்தைப் பற்றிப் பேசிக் கொண்டிருக்கும் இந்நாளில் ஏழைகளுக்கு வரப்பிரசாதமாக இந்தக் கண்டுபிடிப்பு அமைந்தது. பல விதமான பெட்டிகளைச் செய்து அவர் குஜராத்தில் விற்பனையும் செய்துள்ளார். துன்பங்களிலிருந்து விடுபட்டு அந்தத் துன்பத்தையே வாய்ப்பாக மாற்றி தொழிலில் முன்னேறியவர்களில் இவரது பங்களிப்பு மிக முக்கியமானது. ஏழைகளுக்குப் பயன்படும் இத்தகைய குளிரூட்டும் பெட்டிகளை கிராமத்தில் விற்பது நல்ல லாபத்தை ஈட்டும்.

LED  எனப்படும் Light  Emitting display விளக்குகள் மிக அதிக அளவில் விற்பனை செய்யப்பட்டு வருகின்றன. அதேபோல் மின் சிக்கனத்தை ஏற்படுத்தும் பல்வேறு வகையான ஒளிர் விளக்குகள் இன்று சந்தைக்கு வந்துள்ளன. இத்தகைய விளக்குகளை உற்பத்தி செய்யவும் முனையலாம். ஆனால் முதலீடு கூடுதலாக தேவை. வெளிநாடுகளிலிருந்து இறக்குமதி செய்து விற்பனையும் செய்யலாம். அதற்கும் வாய்ப்பு உள்ளது. அரசாங்கம் தீவிரமாக இத்துறையை ஊக்குவித்தால் நல்ல வாய்ப்புகள் உள்ளன.

எலெக்ட்ரானிக்ஸ் துறையைப் பொருத்தவரை, புதிய பொருள்களை உற்பத்தி செய்ய முடியாவிட்டாலும், இருக்கும் பொருள்களை நல்ல விதத்தில் பழுது பார்க்கும் சர்வீஸ் சென்டர்களை உருவாக்கினால் நல்ல வரவேற்பு கிடைக்கும். லேப்டாப், மொபைல், கம்ப்யூட்டர் ஆகியவற்றை சரிசெய்ய தரமான சர்வீஸ் சென்டர் இந்தியாவில் இன்னும் குறைவாகவே உள்ளது. தொழில்நுட்பம் தெரிந்தவர்கள் மட்டுமே இதில் நுழையலாம் என்றில்லை. ஒரு தொழிலை தொடங்கி தகுந்த நபர்களை நியமித்து வாடிக்கையாளர்களைக் கவர்ந்தால் லாபம் நிச்சயம்.

சூரிய சக்தியால் இயங்கும் சாதனங்கள், இன்வர்டர்கள் மற்றும் சில மின்னணுக் கருவிகளின் தேவை நம் நாட்டில் அதிகமாகவே உள்ளது. அதேபோல் கணினி சார்ந்த பொருள்கள் குப்பையாக செயலற்று ஒதுக்கப்படும்போது அவற்றை விஞ்ஞானப்பூர்வமாக மறு சுழற்சி செய்யும் தொழிலும் அதிக அளவில் இனி பேசப்படும்.

பாதுகாப்பு பற்றிய அச்சம் அதிகமாகிக் கொண்டுவரும் இன்றைய சூழலில் உயர் ரிசல்யூஷன் காமிராவின் பயன்பாடுகள் அதிகமாகும். பெரும் பன்னாட்டு நிறுவனங்கள் இத்தகைய காமிராக்களை உற்பத்தி செய்கின்றன. இவற்றை வாங்கி விற்பது நல்ல தொழிலாக அமையும். சந்தை பற்றிய புரிதல், விற்பனை செய்யும் திறன் போன்றவை இருந்தால் இத்தகைய தொழில்களில் தாராளமாக இறங்கலாம்.

சிறு தொழிலில் ஈடுபடும் பலருக்கு சிறு சிறு கடைகள் வைத்து அதன் மூலம் காய் கனிகள், அலங்காரப் பொருள்கள், பரிசுப் பொருள்கள், ஃபேன்ஸி மற்றும் ஸ்டேஷனரி பொருள்கள், மளிகைப் பொருட்கள் போன்றவற்றை விற்பனை செய்யும் எண்ணம் இருக்கலாம். சில்லறை வர்த்தகத்தில் அந்நிய நேரடி முதலீடு இந்தியாவில் அனுமதிக்கப்பட்டிருக்கும் இன்றைய சூழலில், பெரும் வணிக வளாகங்களால் ஓரளவிற்கு வேலை வாய்ப்பும், போக்குவரத்து வசதியும் பெருகும் என்று எடுத்துக் கொண்டாலும், என் கண்ணோட்டத்தில் பல சிக்கல்களை ஏற்படுத்திவிடும் அபாயம் உள்ளது. இந்நிலையில் மக்களின் மனோபாவங்களிலும் பெரும் சிக்கல்களை ஏற்படுத்தும் சூழல் ஏற்பட்டுள்ளது.

இதுவரை நகர்புறங்களிலும், புறநகர் பகுதிகளிலும், கிராமப்புறப் பகுதிகளிலும் அந்தந்த பகுதிகளுக்கென்று ஒரு சிலர் சில்லறை வணிகத்தில் ஈடுபட்டு, கணிசமாக அந்தந்த பகுதி மக்களின் தேவைகளைப் பூர்த்தி செய்யும் வகையில் தொழிலை நடத்திக் கொண்டிருக்கின்றனர். சிறு வணிகர்களுக்கும் பகுதிவாழ் மக்களுக்கும் உள்ள உறவுமுறை காரணமாக வியாபாரம் தொடர்கிறது. மக்கள் தங்களுக்குத் தேவைப்படும் பொருள்களைப் பொறுமையாக நின்று வாங்குகிறார்கள். இந்தக் கடைகள் தங்களுக்குப் பொருத்தமாக இருப்பதாக அவர்கள் நினைக்கிறார்கள். வாங்கும் பொருள்களின் தரத்தைப்பற்றிய நிறை குறைகளை, அந்தந்த கடை முதலாளிகளிடம் தைரியமாக வெளிப்படுத்தமுடியும்.

பன்னாட்டு நிறுவனங்கள் மூலம் உருவாகக்கூடிய பெரிய வணிக வளாகங்களால் மத்தியதர, பொருளாதார ரீதியாக கீழ்மட்டத்தில் இருக்கும் மக்கள் உளவியல் ரீதியாகவும் பெருமளவில் பாதிக்கப்படும் அபாயம் உள்ளது. இந்தப் பெரும் வணிக வளாகங்கள் சில்லறைப் பொருள்களை அதிக அளவில் கொள்முதல் செய்வதால் குறைவான விலைக்கு பொருள்களை விற்கமுடியும். சுயமாக நூறுகட்டு கீரைகளை கோயம்பேடு மார்க்கெட்டிலிருந்து வாங்கி வந்து தெருக்களில் விற்பனை செய்யும், சுயவேலைவாய்பை செய்யும் பெண்கள், ஒரு கட்டுக்கு ரூ. 3 அல்லது ரூ. 4 நிகர லாபம் வைத்து விற்கும் நிலையில், இந்தப் பெரும் வணிக வளாகங்களில், அதே நிலையில் கீரைக்கட்டை 50 சதவிதம் குறைவான விலையில் விற்பார்கள். இந்தச் சில்லறை வியாபாரிகளோடு அந்த பகுதி மக்களும், உறவு முறையின் அடிப்படையில், சில சமயம் கடனுக்கு, பெருட்களை வாங்கிச் செல்வதும் உண்டு. அதே போல் பணத்தை கட்டிவிட்டு பொருள்களை பின்னர் வாங்கிக் கொள்வதும் உண்டு.

ஆனால் பெரும் வணிக வளாகங்கள் விலையுர்ந்த ஆடம்பரமிக்க, கண்ணாடி தடுப்புகளோடு கூடிய மின் விளக்கு அலங்காரத்தில் கேளிக்கை இடங்களாக விளங்குகின்றன. உள்ளே நுழைவதற்கே சாமான்ய மனிதன் மனத் தயக்கத்துக்கு உள்ளாவான். நம் வீட்டுக்கு அருகிலுள்ள மளிகைக் கடைக்குச் செல்லும்போது பெரிதாக நாம் ஒப்பனைகள் செய்துகொள்ளவேண்டிய அவசியமிருக்காது. ஆனால், இத்தகைய ஆடம்பர வளாகங்களுக்கு அப்படிப் போகமுடியாது என்று அவர்கள் நினைப்பார்கள்.

கடை முதலாளிகள் கல்லாவில் அமர்ந்திருக்கும் வாய்ப்பு இல்லாததால் வாடிக்கையாளர் தங்கள் குறைகளை நேரடியாகச் சொல்லும் வாய்ப்பு ஏற்படாது. ஆக பொதுமக்கள் ஒரு சில பொருட்களை குறைவான விலைக்கும், விளம்பரம் மிக்க பொருட்களை அதிகமாகவும் வாங்கும் சூழல் அமையும்.

மேலும் தங்கள் கையிருப்பில் உள்ள பணத்திற்கு பொருட்களை வாங்காமல், தங்கள் கௌரவத்திற்கென பொருட்களை வாங்கிக் குவிக்கும் சூழல் ஏற்படும். அடுத்து சாமானியனை மேலும் கடனாளியாக்கக் காத்திருக்கும் பல அயல் நாட்டு வங்கி நிறுவனங்கள் கடன் அட்டையைக் கொடுத்து சாமானியர்களை குறிவைக்கக் காத்துகிடக்கிறார்கள். கடன் அதிகமாகும் போது மன உளைச்சல்களும், அதிகமாகும் என்பது கண்டறிந்த உண்மை.

பன்னாட்டு முதலைகளிடம் இருந்து தொழில்முனைவோர் எப்படித் தப்பிப்பது?

ஜெயிக்கலாம் தோழி / அத்தியாயம் 19

கடந்த காலங்களில் வங்கிகள் தொழிலதிபர்களுக்கு அதிக அளவு சாதகமாக இருந்தது. இந்திய வங்கிகளின் கண்ணோட்டம் பெரும்பாலும் தொழிலதிபர்களுக்கு கடன் கொடுப்பதை ஊக்குவிக்கும் விதமாகவே இருந்தது. இந்திய வங்கிகளின் கூட்டமைப்பு தொழில் கடன்களை கொடுப்பதில் நடுத்தரமான ஒரு கொள்கையைக் கையாண்டு வந்தது. அதாவது கடன் கொடுக்கும்போது மீடியம் ரிஸ்க் உள்ள தொழில்களையே தேர்ந்தெடுத்தனர். இதன் பொருள், தொழில் தொய்வடைந்தாலும், வங்கிக்கு வர வேண்டிய நிலுவைகளைப் பிணையாக அசையாச் சொத்துக்களிலிருந்து பெற்றுக்கொண்டுவிடலாம்.

ஒரு தொழிலைத் தொடங்க நினைப்பவர் எதிர்காலத்தில் வங்கிக் கடனை ஒழுங்காகச் செலுத்துவார் என்ற நம்பிக்கையிலும் அவரது கடந்த கால வங்கிக்கணக்குகளை வைத்தும் ஒரு வங்கி முடிவு செய்கிறது. ஒரு நல்ல கடந்தகாலத்தை உருவாக்கத் தெரியாத தொழிலதிபர்களால் எப்படி ஒரு நல்ல வளமான வருங்காலத்தை உருவாக்கமுடியும்? வங்கி அதிகாரிகள் வங்கிக் கடன் கொடுக்கும்போது பெரும்பாலும் நமது அதிகபட்ச பொறுமையைச் சோதிப்பது வழக்கமாகும். இது தொழிலதிபர்களுக்கு பெரும் சுமையாக இருந்தாலும், ஏன் அவ்வாறு செய்கிறார்கள் என்றால், உங்கள் தொழிலை நடத்தக்கூடிய அளவு பணத்தை உங்களை வைத்தே புரட்டச் செய்ய வேண்டுமென்பதால், இதை சரியாகப் புரிந்துக் கொள்ளவேண்டும்.

சுயதொழிலுக்கு வருபவர்கள் சவால்களைச் சமாளிக்கும் திறன் படைத்தவர்களாக இருப்பது அவசியம். அதனால் புதிதாக வரும் தொழில்முனைவோர் தங்கள் கனவுகளை எண்களோடு அதாவது டார்கெட்டோடு தொடர்புப்படுத்தி தொழில் செய்யப் பழகுங்கள். மாதாந்திரத் தொழிலுக்கான குறியீடுகளை நிர்ணயித்துக் கொள்ளுங்கள்.

இப்படி நிர்ணயித்துக்கொண்டு பணிபுரியும்போது வியாபாரம் நிச்சயமாக விரிவடையும். விரிவடைந்து வரும் தொழில் மூலதனத்திலிருந்து, ஒரு குறிப்பிட்ட தொகையை எடுத்து தனியாக சேமிப்பது அவசியம். இது நிறுவனத்தின் பலமாக உருமாறும்.

உங்கள் தொழில் நிறுவனங்களுக்கு கிடைக்கும் கடன்கள் என்பது (குறுந்தொழில்களைப் பொருத்தவரை) தனிநபர் கடன்களே. ஆகவே தனிநபர்களின் Networth எனப்படும் சுயமதிப்பீட்டை முடிந்தவரை உயர்த்திக்கொள்ளவேண்டும்.

சமீபத்தில் DARE எனப்படும் நாளிதழ் குறுந்தொழிலுக்கான சமூக அறிவை அதிகப்படுத்தும் நோக்கத்துடன் ஒரு கருத்தரங்கை ஏற்பாடு செய்திருந்தது. அதில் சிறு மற்றும் குறுந்தொழில்களைப் பாதிக்கும் இரு பெரும் அங்கங்களாக கடனுதவியும் தொழில்நுட்ப அறிவும் எடுத்துக்கொள்ளப்பட்டது. இதில் தமிழ்நாட்டிலுள்ள சில முக்கிய நகரங்களின் போக்கைப்பற்றி விரிவாக அலசப்பட்டது. அதன் ஒரு சில துளிகளை கீழே பார்ப்போம்.

கோவையைப் பொருத்தவரை பெரும் என்ஜினியரிங் சார்ந்த யூனிட்களின் தேவை அதிகரிக்கப்பட்டுள்ளது. அந்தப் பயிலரங்கில் பேசிய பலரும் தொழில்நுட்ப அறிவை வளர்த்துக் கொள்ளுதல் தொழிலதிபர்களுக்கு மிக அவசியமானது என்பதையும், இதனால் தொழிலுக்கு ஏதுவாகும் என்றும், பணமும் நேரமும் மிச்சப்படுத்த தொழிலதிபர்களால் இயலும் என்பதையும் எடுத்துக்காட்டினார்கள்.

சென்னையைப் பொருத்தவரை கணினிச் சார்ந்த துறைகள் (ஹார்ட்வேர், சாஃப்ட்வேர்) மிக அதிக அளவில் பொருளீட்டும் வாய்ப்புகள் பெற்றுள்ளன என்று கணிக்கப்பட்டது. திருவனந்தபுரமும் இத்துறைகளில் மிக அதிக அளவில் பேசப்படும் ஒரு வர்த்தக இடமாக மாறிக்கொண்டு வருகிறது.

0

இந்தியாவில் ஒரு நிறுவனத்தை உருவாக்கி அதைப் பதிவு செய்வதற்கு குறைந்தது 20 முதல் 40 நாள்கள் தேவைப்படுகின்றன. தொழில் என்று வரும்பொழுது நிறுவனங்களின் தன்மையையும் அதை பதிவு செய்வதற்கு வேண்டிய சட்டத்தேவைகளையும் அடிப்படையாகத் தெரிந்துக் கொள்ள வேண்டும்.

தனி நபர்கள் மட்டும் அங்கத்தினராக இருந்து தொடங்குவதை நிறுவனம் என்று அழைப்பர். இத்தகைய நிறுவனங்களை நடத்துபவர், அதாவது தொழில்முனைவோர் Current Account எனப்படும் வியாபாரக் கணக்கை வங்கியில் தொடங்க வேண்டும். நான் முன்பே சொல்லியது போல் இத்தகைய தனிநபர் நிறுவனங்களுக்கு வருமான வரிக்கான பதிவுகள் மற்றும் சேவை வரிக்கான பதிவுகள் அவசியம். மின்சாரம் வணிகத்துக்குத் தேவையான மறுமதிப்பீடு செய்து, செலுத்த தொடங்கியிருக்க வேண்டும் (Commercial E.B).

அடுத்து பிரைவேட் லிமிடெட் எனப்படும் கூட்டு நிறுவன அமைப்பைப் பற்றி பார்ப்போம். இத்தகைய நிறுவனங்களுக்கு குறைந்தபட்சம் இரண்டு இயக்குநர்களும் இரண்டு பங்குதாரர்களும் தேவை. அதிகபட்சமாக 50 பங்குதாரர்கள் வரை இருக்கலாம். இயக்குனர்களின் அளவுக்கு உச்சவரம்பு கிடையாது. ஒவ்வொரு நிறுவனமும் தங்களுக்கென்று Articles of Association என்பதை உருவாக்கி, அதாவது நிறுவனத்துக்குரிய சட்டவிதிகளை ஏற்படுத்தி அதிகபட்ச இயக்குநர்களின் தொகையை நிர்ணயித்துக் கொள்ளலாம். இத்தகைய பிரைவேட் லிமிடெட் நிறுவனங்களுக்கு குறைந்தபட்ச முதலீடு ஒரு லட்சம். பொதுமக்களிடமிருந்து முதலீடு வாங்க முடியாது. எனினும் இயக்குனர்களிடமிருந்தும் பங்குதாரர்களிடமிருந்தும் அவர்களது உறவினர்களிடமிருந்தும் deposit எனப்படும் வைப்புத் தொகைகளை முதலீடாகப் பெற்றுக் கொள்ள முடியும். பங்குதாரர்கள் தங்களுடைய பங்குகளை அந்நிறுவனத்தின் சட்டதிட்டங்களுக்கு ஏற்ப மாற்றிக் கொள்ள முடியும்.

பப்ளிக் லிமிடெட் எனப்படும் பொதுத்துறை நிறுவனங்களின் அடிப்படை விதிகளைப் பார்ப்போம். இந்த நிறுவனங்களின் குறைந்தபட்ச முதலீடு 5 லட்சமாகும். இயக்குனர்களின் எண்ணிக்கை மூன்றாக இருத்தல் அவசியம். பங்குதாரர்களின் குறைந்தபட்ச எண்ணிக்கை ஏழு, அதிக பட்ச உச்சவரம்பு இல்லை. பொதுமக்களிடமிருந்து முதலீட்டுக்கு பணத்தை வசூலிக்கலாம்.

ஜெயிக்கலாம் தோழி / அத்தியாயம் 21

வாடிக்கையாளரின் தேவைகளை அறிந்து கொள்ள இத்தகைய சமூக வலைத்தளங்கள் பெரிதும் பயன்படுகின்றன. வாடிக்கையாளரின் விருப்பு வெறுப்புகள், மனநிலை போன்றவற்றை எடைப்போடுவதற்கு இவை பெரிதும் பயன்படுகின்றன என்பது வல்லுனர்களின் கருத்து. வர்த்தக உலகிலும் இந்த வலைத்தளங்கள் பெரும் பங்காற்றுகின்றன.

வாடிக்கையாளர்களைப் பொருத்தவரை இணையம் ஒரு அறிவுச் சுரங்கம். தாங்கள் வாங்க விரும்பும் பொருள்கள் அல்லது பெறவிரும்பும் சேவை குறித்து வாடிக்கையாளர்கள் இணையத்தில் இருந்து போதுமான தகவல்களைத் திரட்டிக்கொள்ளலாம். தங்கள் அனுபவங்களையும் அவர்கள் பகிர்ந்துகொள்ளலாம்.

இந்தத் தளங்களை நிறுவனங்களும் பயன்படுத்திக்கொள்கின்றன. இணையம் வாயிலாக அதிகச் செலவின்றி தங்கள் பொருள்களையும் சேவைகளையும் அவர்களால் சந்தைப்படுத்தமுடிகிறது. குறிப்பாக, சிறு தொழில் செய்வோருக்கு இத்தகைய வலைத்தளங்கள் உதவத் தொடங்கியுள்ளன. ஆகவே தொழில்முனைவோர் தகுந்த வல்லுநர்களளோடு கலந்து பேசி தங்கள் முயற்சியை விரிவுப்படுத்தவேண்டும்.

பெரும்பாலான தொழிலதிபர்கள் இத்தகைய சமூக வலைத்தளங்களை முக்கியமான தொடர்பு ஊடகமாகக் கருதுகின்றனர். எஃப்எம்சிஜி தயாரிப்புகள், ஆட்டோமொபைல் உள்ளிட்ட துறைகளில் சமூக வலைத்தளங்கள் குறிப்பிடத்தக்க பலன்களை அளித்துள்ளன என்பது தெரியவருகிறது. மற்ற பிரிவினரும் அதிக அளவில் இத்தகைய வலைத்தளங்கள்மூலம் வியாபாரத்தைப் பெருக்கிக் கொள்ள முயன்று வருகின்றனர்.

இந்தியாவைப் பொறுத்தவரையில் ஏற்றுமதி துறையில் சிறுதொழில்களின் பங்கு கணிசமானது. பொதுவாக தோல் ஆடைகள், ஆயத்த ஆடைகள், ரசாயனப் பொருள்கள், மருந்துகள், உணவு சார்ர்ந்த பொருள்கள், நகைகள் மற்றும் செயற்கை கற்களாலான அணிகலன்கள் அதிகம் ஏற்றுமதி செய்யப்படுகின்றன. ஏற்றுமதியில் மரபுவகை சாராத பொருள்கள் பெரும் பங்கு வகிக்கின்றன.

இந்திய சிறுதொழில் முனைவோருக்கு அமெரிக்கா, ஐரோப்பா, ஜப்பான் ஆகிய நாடுகளில் ஏற்றுமதி வாய்ப்புகள் உள்ளன. ஏற்றுமதியில் ஈடுபடும் சிறு மற்றும் குறுந்தொழில் நிறுவனங்களுக்கு அரசாங்கம் ஏற்றுமதிக்கான கடனுதவி, தொழில்நுட்பம், சந்தைப்படுத்துதல் உள்ளிட்ட உதவிகளை அளிக்கிறது. தமிழ்நாட்டைப் பொறுத்தவரை ஆயத்த ஆடைகள், கடல் பொருள்கள், பொறியியல் இயந்திரங்கள், விளையாட்டுப் பொருள்கள் பெருமளவில் ஏற்றுமதி செய்யப்படுகின்றன.

இவைத் தவிர பலவிதமான வருமான வரி சலுகைகளும் அளிக்கப்படுகின்றன.
அதே சமயத்தில் எந்த அந்நிய நாட்டு நிறுவனமாவது இந்தியாவில் தரம் குறைந்த மலிவான பொருள்களை இந்திய தொழிலதிபர்களின் துணையோடு விற்பதற்கு முன் வந்தால், அவை கண்காணிக்கப்படுகின்றன. ECGCI எனப்படும் Export Credit Guarantee of Corporation of India என்ற அமைப்பு ஏற்றுமதியாளர்களக்கு, குறிப்பாக சிறுதொழில் அதிபர்களுக்கு ஊக்கத்தொகை அளிக்கிறது.

இநத இடத்தில், சிறு தொழில் குறுந்தொழில் ஆகியவற்றின் அடிப்படைகளைத் தெரிந்துகொள்வது பொருத்தமாக இருக்கும்.

பொதுவாக பொருள் உற்பத்தி செய்யும் பிரிவில் வரும் சிறு தொழில்கள் Plant and Machinery எனப்படும் உற்பத்திக்கான இயந்திரங்களின் மதிப்பு ரூ.25 லட்சத்துக்கு அதிகமாகவும் ரூ. 5 கோடிக்கு குறைவாகவும் இருக்க வேண்டும்.

இதற்கும் கீழே முதலீடு உள்ள தொழில்கள் குறுந்தொழில் எனப்படும்  Tiny sector பிரிவின் கீழ் வரும். இதற்கு அதிகமாக முதலீடு இருந்தால் அவை சிறுதொழில் பிரிவின் கீழ்வராது. அதேபோல் சேவை பிரிவின்கீழ் வரும் நிறுவனங்கள், ரூ. 10 லட்சத்திலிருந்து ரூ. 2 கோடி வரை பொருளீட்டும் வசதி படைத்தவையாக இருந்தால் மட்டுமே சிறுதொழில் நிறுவனங்களாக அங்கீகரிக்கப்படும்.

சிறு தொழில்களை பொருத்தவரை, தவறுகளே இல்லாத வெற்றியை மட்டும் பெற்றுத்தரும் தொழில் என்று எதுவும் இல்லை. அதிகபட்ச ஒழுங்குடன் ஒரு தொழிலை நடத்தி பணம் சம்பாதித்தவர்கள் என்று எளிதாக கூறிவிட முடியாது.

ஏற்கெனவே சந்தையிலுள்ள பொருளாக இருந்தாலும்கூட, நாம் அதை எப்படி சந்தைப்படுத்த முன் வருகின்றோம் என்பதை பொருத்தே, நமது வெற்றி தோல்விகள் அமையும். ஒரு பகுதியில் வெற்றி பெரும் தொழில்கள், வேறுசில பகுதிகளில் பலமான தோல்வியைச் சந்திக்கலாம். ஒருவரது அனுபவங்களிலிருந்து பெறப்படும் பாடங்கள், மற்றவர்களுக்கு முன்னுதாரணமாக இருக்குமென்று சொல்லிவிடமுடியாது.

உதாரணமாக உணவுத் தொழிலில், ஏற்றுமதியில் ஒருவர் முன்னேறுகிறார் என்று வைத்துக் கொண்டால், அத்துறையில் ஈடுபடும் அனைவரும் ஏற்றுமதி செய்தால் மட்டுமே, வெற்றிப்பெற முடியும் என்பது கிடையாது. மாறாக, மற்றவர் உள்ளூர் சந்தைக்கு மட்டும் பொருள்களை விற்று தனக்கென ஒரு நிலையான வியாபாரத்தை ஏற்படுத்திக் கொள்ள இயலும். ஆகவே, தொழில் செய்வோர் தங்கள் அனுபவங்களைக் கூர்ந்து கவனிக்கவேண்டும். அப்போதுதான் புதுப்புது உத்திகளை கையாளமுடியும்.

நம் உத்திகள் நாம் தொழில் செய்யும் இடத்துக்கும், நம் வாடிக்கையாளர் இருக்கும் இடத்துக்கும் ஏற்ப மாறுதலுக்கு உட்பட்டு இருக்கவேண்டும். நம் இலக்குக்கு உட்பட்ட வாடிக்கையாளரின் தேவைகளையும் பிரச்னைகளையும் அறிந்து கொள்ள வேண்டியது மிகவும்அவசியம்.

பொறியியல் துறையைப் பொறுத்தவரை புதுபுது உத்திகளை பரீட்சித்து பார்க்கலாம். பலருக்கும் ஒரே பொருளை நாம் விற்றாலும், பலர் தரும் ஒரே சேவையை நாம் செய்தாலும், நமக்கென தனித்துவத்தை சந்தையில் ஏற்படுத்தவேண்டியது மிக அவசியம். USP எனப்படும் Unique Selling Point அவசியம்.

இதற்கு சந்தையில் பல உதாரணங்களை சொல்ல முடியும். இட்லி நமக்குப் புதிதல்ல. இருப்பினும் சரவண பவன் முதன் முதலில் தொடங்கியபோது, அதே இட்லி வகையை சிறுசிறு தட்டுகளில் ஊற்றி கிண்ணத்தில் வைத்த சாம்பாரை தட்டு முழுவதும் நிரப்பி அதில் சிறு இட்லிகளை மிதக்கவிட்டு, 14 இட்லி என்று பெயரிட்டு அறிமுகப்படுத்தினர். அதுவரை எல்லோரும் விற்றுக்கொண்டு வந்த சாதாரண இட்லியை புதிய முறையில் இவர்கள் அறிமுகப்படுத்தினார்கள். இட்லி, தோசைக்கான மாவுப் பொட்டலங்கள் கடைகளில் விற்கப்படுவதும் ஓர் உத்திதான்.

பலவித பற்பசைகள் சந்தையில் விற்பனை ஆனாலும், இன்றைய இளைய சமுதாயத்தினரிடம் க்ளோஸ் அப்புக்கு தனி மவுசு உண்டு. காரணம் இது காதலர்களுக்கானது என்று சொல்லி அறிமுகப்படுத்தப்பட்டது.

முன்பெல்லாம் சராசரியாக அலுவலகம் செல்லும் அனைவருமே, தங்கள் மதிய உணவை கையோடு கொண்டு செல்லும் வழக்கம் இருந்தது. ஆனால் மாம்ஸ் கிச்சன் என்ற நிறுவனத்தை நிறுவிய இரு இளைஞர்கள், மதிய உணவை அலுவலகங்களுக்கு கொண்டு சென்று கொடுக்கும் முறையை அறிமுகப்படுத்தினர். கணினித் துறையில் மென்பொருள் உற்பத்தியில் ஈடுபட்டிருக்கும் பல நிறுவனங்கள் தங்கள் பணியாளர்களுக்காக பெரும் உணவுக்கூடங்களை நிறுவி காலை, மதிய, மாலை, இரவு உணவுகளை அளித்து வந்தன.

இருப்பினும், கடினமான செயல்திறனோடு வேலையில் ஈடுபட்டிருக்கும் இத்துறை இளைஞர்கள், ஒரேவிதமான சுவையுடன் கூடிய தங்கள் அலுவலக உணவுக்கு மாற்றுத் தேடினர். அவர்களுடைய மேஜைக்கே மாம்ஸ் கிச்சன் விதவிதமான உணவு வகைகளைக் கொண்டு வந்ததால் நல்ல வரவேற்பு பெற்றது.

ஒவ்வொரு பிரச்னையிலும் புதிய தேவைகள் ஒளிந்திருக்கின்றன. ஒவ்வொரு தேவையும் ஒரு வியாபார உத்தியை உள்ளடக்கியுள்ளது.

ஜெயிக்கலாம் தோழி / அத்தியாயம் 23

நிகழ்ச்சிகள், விழாக்கள் குறித்த மக்களின் கண்ணோட்டம் வெகுவாக மாறியிருக்கிறது. ஒரு எளிய பிறந்த நாள் விழாகூட பலருடைய கவனத்தை ஈர்க்கும் வகையில் ஒரு கொண்டாட்ட அனுபவமாக இருக்கவேண்டும் என்று பலர் இன்று விரும்புகிறார்கள். நிறுவனங்கள் என்றால் கேட்கவே வேண்டாம். ஒரு புதிய தயாரிப்பு அல்லது சேவை அறிமுகப்படுத்தப்படுகிறது என்றால் அது விமரிசையாக, பலருடைய கவனத்தைக் கவரும் வகையில் இருக்கவேண்டும் என்றே விரும்புகிறார்கள். இப்படிப்பட்ட ஒரு நிகழ்ச்சியை முன்னின்று நடத்துவது மிகவும் கடினமானது.

இந்தச் சூழலில்தான், ஈவண்ட் மேனேஜ்மெண்ட் எனப்படும் தொழில் வாய்ப்பு முக்கியத்துவம் பெறுகிறது. இந்தத் துறையில் ஈடுபட விரும்புபவர்கள் கவனத்தில் கொள்ளவேண்டிய சில முக்கிய அம்சங்கள் உள்ளன. உதாரணத்துக்கு, நல்ல பேச்சுத் திறமை வேண்டும். சோஷியல் நெட்வொர்கிங் எனப்படும் சமூக தொடர்புகளை நல்லவிதமாக ஏற்படுத்திக்கொள்ளும் திறன் வேண்டும்.

சினிமா துறை (ஒலிநாடா வெளியீடு), கல்லூரி, பள்ளி ஆண்டு விழாக்கள், கலை நிகழ்ச்சிகள், புத்தக வெளியீட்டு விழாக்கள், திருமணம், விளையாட்டுப் போட்டிகள், கோவில் விழாக்கள், சமூக ஆர்வலர்களால் நடத்தப்படும் நிகழ்ச்சிகள் என்று பலதரப்பட்ட வாய்ப்புகள் கொடடிக்கிடக்கின்றன.

முதலில் ஒரு பெயரைப் பதிவு செய்து நிறுவனமாக உங்களை மாற்றிக்கொள்ளவேண்டும். சிறுசிறு நிகழ்ச்சிகளை வடிவமைத்து நடத்தவேண்டும். மக்கள் தொடர்புகளை அதிகப்படுத்திக் கொண்டே வரவேண்டும். எங்கே, எந்த இடத்தில், எந்தப் பொருள், சேவை கிடைக்கும் போன்ற தகவல்களை விரல் நுனியில் வைத்திருக்க வேண்டும். இணையம் இதற்குக் கைகொடுக்கும்.
எந்தெந்த நிகழ்ச்சிகள் எங்கெங்கே நடக்கவிருக்கிறது போன்ற தகவல்களை சிறிது சிறிதாகச் சேகரிக்க வேண்டும். இந்த நிகழ்ச்சியை நடத்த நினைப்பவரை தொடர்புக்கொண்டு, உங்களை அறிமுகப்படுத்திக்கொள்ளவேண்டும்.

ஒவ்வொரு நிகழ்ச்சிக்கும் ஒவ்வொரு வடிவம் இருக்கும். நிகழ்ச்சியை நடத்துபவர்களுக்கென்று பிரத்தியேக குணங்கள், ரசனைகள் இருக்கும். இவற்றை நன்கு அறிந்துவைத்துக்கொண்ட பிறகே நிகழ்ச்சிக்கான திட்டமிடல்களைத் தொடங்கவேண்டும். அதே போல், நிகழ்ச்சி நடத்த இருப்பவரின் பட்ஜெட் என்ன என்பதை அறிந்துகொள்ள வேண்டும். ஒரு சிலர் விழாக்கள் எளிமையாகவும் நளினமாகவும் இருக்கவேண்டும் என்று விரும்புவர். வேறு சிலரோ நல்ல ஆடம்பரத்துடன் விழா நடைபெறவேண்டுமென்று விருப்பப்படுவர். இடத்துக்கு ஏற்ப, நீங்கள் அளிக்கபோகும் சேவைகளைப் பகுதிவாரியாகப் பிரித்துக்கொண்டு பணியாற்றவேண்டும்.

நிகழ்ச்சியை நடத்துவதற்கு நல்ல கற்பனை வளம் தேவை. நிகழ்ச்சி நடக்கவிருக்கும் அரங்கம், வரும் விருந்தாளிகளின் எண்ணிக்கை போன்றவற்றை மனதில் கொண்டு முடிவு செய்ய வேண்டும். உணவு வழங்கப்படும் நிகழ்ச்சியாக இருப்பின் எத்தகைய உணவு, அதில் பரிமாறப்படும் வகைகள் என்னென்ன ஆகியவற்றைக் குறிப்பிட வேண்டும்.

குழந்தைகள் பங்கு கொள்ளும் நிகழ்ச்சியாக இருக்கும் பட்சத்தில், குழந்தைகளுக்கான கலை நிகழ்ச்சிகள், பரிசுகள் என்று பலவற்றையும் கருத்தில் கொள்ள வேண்டும். நுழைவு வாயில் அலங்காரம், மேடை அலங்காரம், அரங்க அமைப்பு, விழா அழைப்பிதழ், நிகழ்ச்சிக்கு தலைமை ஏற்கும் நபர்கள் என்று ஒவ்வொன்றையும் கவனத்தோடு முடிவு செய்ய வேண்டும்.

பல நபர்களை ஒருங்கிணைப்பதன் மூலமே ஒரு நிகழ்ச்சியை சிறப்பாக நடத்த முடியும் என்பதால் பலதரப்பட்ட மனிதர்களையும் அவர்களுடைய குணாதிசயங்களையும் அறிந்து கொள்ளவேண்டும். மதம் மற்றும் சமூகத் தொடர்பான நிகழ்ச்சியாக இருக்கும் பட்சத்தில், மற்றவர்கள் மனம் புண்படாதவாறு நிகழ்ச்சி நிரலை அமைத்தல் மிக அவசியம்.

உதாரணத்துக்கு, ஒரு திருமண நிகழ்ச்சியாக அல்லது பிறந்த நாள் விழாவாக இருக்கும் பட்சத்தில், அதை நடத்துபவரின் விருந்தாளிகளில் சைவம் உண்பவர்களும் அசைவம் உண்பவர்களும் இருப்பார்கள். அனைவரையும் திருப்திபடுத்தும் வகையில் தனித்தனியே ஏற்பாடுகள் செய்யப்படவேண்டும்.

நிகழ்ச்சி நடப்பதற்கு முதல் நாளோ அல்லது நடக்கும்போதோ ஒருசில தடைகள் உருவாகலாம். குறிப்பிட்ட நேரத்தில் எதிர்பார்த்த பொருள்கள் வந்து சேராமல் இருக்கலாம். அல்லது தகுந்த நபர்கள் ஒரு வேலையைச் செய்வதற்கு கிடைக்காமல் போகலாம். எப்படி இருப்பினும், எந்த ஒரு சிக்கலிலும் மாற்று ஏற்பாடுகளை யோசிக்கத் தெரிந்தவர்களாக இருக்கவேண்டும். அந்த மாற்று ஏற்பாடுகளை குறித்த நேரத்தில் சரியாக செய்து நிகழ்ச்சி நடத்துபவர்கள் மனம் கோணாதவாறு முடிக்க வேண்டும்.

எழுத்துப்பூர்வமாக தான் செய்யும் ஏற்பாட்டை நிகழ்ச்சி நடத்துபவரிடம் கொடுத்து அவர்களின் சம்மதத்தை எழுத்துப்பூர்வமாகப் பெற்றுக்கொள்ளவேண்டும். இதன்மூலம் விழாவை நடத்துபவருக்கும் நடத்த முன்வரும் தொழிலதிபருக்கும் கருத்து வேற்றுமையைத் தவிர்க்க முடியும். இத்தொழிலில் உள்ள ஒரு பெரிய அனுகூலம் என்னவென்றால், முதலில் நான்கைந்து நிகழ்ச்சிகளை மிகச் சிறப்பாக நடத்தி கொடுத்துவிட்டால், ஏனைய நிகழ்ச்சிகள் தாமாகவே தேடிவரும். நிறைவடைந்த வாடிக்கையாளர்களே மக்கள் தொடர்பு அதிகாரிகளாக மாறிவிடுவார்கள்.

ஒரு விழா சிறப்பாக நடைபெறும்போது, விருந்தாளிகளின் கவனத்தைக் கவர்ந்துவிட்டால் யார் இதை நடத்துவது என்று விசாரிதது நிச்சயம் உங்களைத் தேடி அவர்களே வருவார்கள். பெரும் செல்வந்தர்களின் வீட்டில் நிகழ்ச்சிகளும் கேளிக்கை விருந்துகளும் எப்போதும் நடந்துகொண்டே இருக்கும்.

0

கணினி தொழில்நுட்பத்திலும், கணினி மொழிகளிலும் தேர்ச்சி பெற்றவராக நீங்கள் இருக்கும் பட்சத்தில் டாகுமெண்ட் ரைட்டிங் எனப்படும் தொழில் வாய்ப்புகளை நீங்கள் பயன்படுத்திக்கொள்ளலாம். இன்று பல சிறிய/பெரிய நிறுவனங்கள் தங்களைப் பற்றி குறுந்தகடு அல்லது டாகுமெண்டரி படம் உருவாக்குவதில் ஆர்வம் காட்டுகின்றனர்.

விற்பனைப் பிரிவு அதிகாரிகளை வைத்துக்கொண்டு பல மணி நேரம் தங்கள் நிறுவனத்தைப் பற்றியும், தாங்கள் விற்பனை செய்யும் பொருள்களைப் பற்றி பேசுவதை விட, PPT எனப்படும் பவர் பாயிண்ட் பிரஸென்டேஷன் மூலம் பல வாடிக்கையாளரைக் கவரமுடியும்.
வேண்டிய கருத்துக்களை நறுக்கென்று, எளிமையாக ஆனால் புதுமையாக எடுத்துச் சொல்ல இப்படிப்பட்ட முறைகள் பெரிதும் பயன்படுகின்றன. சுயதொழில் செய்ய நினைப்போர் கற்பனைத்திறன் உள்ளவர்களாக இருந்தால் இத்தொழிலில் மிக நல்ல முறையில் இறங்க முடியும்.

சிறு முதலீட்டில் இத்தொழிலை ஆரம்பிக்க முடியும் என்பது இதன் மிகப்பெரிய பலமாகும். விளம்பரங்களுக்கான வாசகங்களை எழுதுதல், விளம்பரப் படங்களுக்கான உட்கருத்துகளை வடிவமைத்தல் போன்றவையும் சுயத் தொழிலுக்கு ஏற்றவையே. அதேபோல் பல நிறுவனங்களைப் பற்றிய வாழ்க்கை வரலாற்றை அந்த நிறுவனம் கடந்து வந்த பாதை, சந்தித்த சவால்கள், பெற்ற விருதுகள், தொழிலில் செய்த சாதனைகள் போன்றவற்றை ஒரு திரைப்படத்துக்குரிய நேர்த்தியோடு, வடிவமைக்க முன்வந்தால் அதுவும் நல்ல தொழிலாக அமையும்.

இத்தொழிலில் இறங்குவோர்க்கு மொழிகளின் ஆளுமை, நல்ல தேர்ச்சி போன்றவை மிக அவசியம். இதுவும் மக்கள் தொடர்புடைய தொழிலென்பதால், மக்களின் உணர்வுகளை, விருப்பங்களை, ரசனைகளை எடைபோடத் தெரியவேண்டும். எளிதாக மாநில எல்லைகளைத் தாண்டி நாட்டின் எல்லைகளைத் தாண்டித் தொழிலை விரிவுப்படுத்தும் வாய்ப்புகளும் மிக அதிகம். மேலும் செல்வத்தோடு சேர்த்து பெரும் புகழும் உங்களை வந்தடையும்.

ஜெயிக்கலாம் தோழி / அத்தியாயம் 25

இன்று மத்திய, மாநில அரசுகள் குறுந்தொழில் வளர்ச்சிக்குப் பலவாறான சலுகைகள் அளிக்கின்றன. இருந்தாலும், இன்றைய சூழலில் சுயதொழில் செய்ய யார் முன்வருகிறார்கள்? குறிப்பாக பெண்கள் முன்வருகிறார்களா? இல்லை என்றே பதிலளிக்கவேண்டியிருக்கிறது. காரணம், இன்றும் அரசாங்கச் சூழல் சிறுதொழிலுக்கு அனுகூலமாக இல்லை.

உதாரணத்துக்கு வங்கிகளை எடுத்துக்கொள்வோம். சுயதொழில் முனைவோருக்கு வங்கிகள் கடன் கொடுக்கின்றனவா? பெரும்பாலான வங்கி அதிகாரிகள் கடன் கொடுக்கத் தயங்குகிறார்கள் என்பதே உண்மை. ஒருவேளை கடன் கொடுத்து அது திரும்பி வராமல் போனால் பதில் சொல்லியாகவேண்டும் என்னும் எண்ணத்தில் கடன் கொடுப்பதை இவர்கள் தவிர்க்கின்றனர். வங்கிக் கிளை மேலாளர்களுக்கு தெளிவான வழிமுறைகளையும் விதிகளையும் அரசாங்கம் முதலில் நிர்ணயிக்க வேண்டும்.

நேர்மாறாக, ஒரு சில வங்கி அதிகாரிகள் தங்களுக்குத் தெரிந்தவர்களுக்கும் சிபாரிசோடு வருபவர்களுக்கும் முன்னுரிமை அளித்து, தகுதியில்லா நபர்களுக்கும் கடன் கொடுக்கின்றனர். அசையாச் சொத்துகள் இல்லாத நபர்களுக்கும் கடன் கொடுப்பதற்கு விதிமுறைகள் உள்ளன. ஆனால், அவற்றை பெரும்பாலும் நடைமுறைப்படுத்துவதில்லை. ஆகவே வங்கிக் கடன் குறித்த தெளிவான விதிமுறைகளை பொதுமக்கள் அறியுமாறு அரசு விளம்பரப்படுத்தவேண்டும். தகுதியுள்ள நபர்களுக்குக் கடன் கிடைப்பதையும் உறுதிசெய்யவேண்டும்.

குறுந்தொழில் அதிபர்களுக்கு திறமையான ஆள்கள் கிடைப்பது அரிதாகி கொண்டுவருகிறது. நல்ல நபர்களைத் தேர்வு செய்யும் பொழுது, பெரும் பணத்தை ஊதியமாக அளிக்க வேண்டி வருகிறது. இதற்கு அரசாங்கம் கீழ்க்கண்டவாறு செய்யலாம்.

1. அரசாங்க வேலைக்கு பணி நியமனம் செய்யும்போது ஒவ்வொரு நபரும் குறைந்தபட்சம் இரண்டு வருடங்களாவது அங்கீகரிக்கப்பட்ட, நேர்மையாக தொழில் செய்து கொண்டிருக்கும் குறுந்தொழில் அலுவலகங்களில் பணி புரிந்து இருக்க வேண்டும் என்பதை கட்டாயமாக்கலாம்.
2. குறுந்தொழில், சிறுதொழில் பிரிவுகள் இன்னமும் மேலெழுந்தவாரியாகப் பிரிக்கப்பட்டுள்ளது. ரூ.25 அல்லது 50 லட்சம் டர்ன்ஓவர் செய்யும் கம்பெனிகள் குறுந்தொழில் பிரிவிலும், 5 கோடி டர்ன்ஓவர் செய்யும் கம்பெனிகள் சிறுதொழிலாகவும் பிளாண்ட் அண்ட் மெஷினரியின் அடிப்படையில் பிரிக்கப்பட்டுள்ளது. குறுந்தொழில் மற்றும் சிறுதொழில் பிரிவுகள் இன்னமும் விரிவாகப் பிரிக்கப்படவேண்டும். அதேபோல் வரிச்சலுகைகளும் இப்பொழுதைவிட அதிகமாக அளிக்கப்பட வேண்டும்.
3. அரசு டெண்டர்களில் பங்கு பெறும்போது பலவித பெரிய ஆர்டர்களுக்கு அரசாங்கம் விதிக்கும் விதிமுறைகளில் சிறு மற்றும் குறுந்தொழில் நிறுவனங்கள், பங்குபெற முடியாமல் போகிறது. இதற்கு மாறாக மத்திய, மாநில அரசுகள், எந்த தொழிலையும் வாங்குவதற்கு முன், அதன் எண்ணிக்கை மற்றும் அளவுக்கு ஏற்றவாறு அதைப் பிரித்து, அந்தந்த பகுதியிலுள்ள சிறு மற்றும் குறுந்தொழில் நிறுவனங்களுக்குப் பிரித்து கொடுக்க வழிவகை செய்தால் சிறுதொழில்கள் இன்னும் நன்கு வளரும்.

இன்று பெரிய பன்னாட்டு நிறுவனங்கள் உற்பத்தி அதிகம் செய்வதால் பொருள்களின் விலையை கணிசமான முறையில் குறைக்க முன்வந்துள்ளன. குறு மற்றும் சிறு தொழில் நிறுவனங்களால் அவற்றோடு போட்டிப் போட முடியவில்லை.

பொதுமக்களும் சிறு மற்றும் குறுந்தொழில் நிறுவனத்தைப் பற்றிய தங்களின் மதிப்பீட்டுகளை மாற்றிக் கொள்ள முன் வரவேண்டும். எந்த தொழில் நிறுவனமும், தொழிலில் நேர்மையோடு பெயர் பெற்று விளங்குமானால், அவற்றின் பொருள்களுக்கு ஆதரவு அளிக்க மக்கள் முன் வர வேண்டும்.

அடுத்ததாக, குறு மற்றும் சிறு தொழில்களுக்கு பெரும்பாலும் விளம்பரம் அளிப்பதற்கு பணப்பற்றாக்குறை இருக்கும். ஆதலால் அரசாங்கம் நாளிதழ்கள் மற்றும் தொலைக்காட்சி ஊடகங்கள் மூலமாக விளம்பரம் செய்வதற்கு அந்த நிறுவனங்களுக்குப் பரிந்துரை செய்ய வேண்டும். இந்த நிறுவனங்கள் தங்கள் விளம்பர வருமானத்தில் குறிப்பிட்ட சதவிகிதம் குறுந்தொழில் நிறுவனங்களுக்கு சலுகைகள் அளிப்பதன் மூலம் ஈட்டியிருக்க வேண்டும்.
இதை மேம்போக்காகச் செய்யாமல் கட்டாயமாக்கினால் நலிந்துகொண்டிருக்கும் சிறு மற்றும் குறுந்தொழிலின் சந்தை விரிவடையும். இதனால் அத்தொழில்கள் வீழ்ச்சி அடையாமல் வளர்ச்சி அடையும்.

அடுத்ததாக குறுந்தொழில் நிறுவனங்களில் பணிபுரியும் ஊழியர்களுக்காக, அரசாங்கம் சில சலுகைகளை அளிக்க முன்வரவேண்டும். இதன் மூலம் ஈஎஸ்ஐ மற்றும் பிஎஃப் உட்பிரிவுகளுக்குள் வராத குறுந்தொழில் நிறுவனங்களில் வேலை செய்யும் ஊழியர்களின் நலன் காக்கப்படுகிறது. ஒரு குறிப்பிட்ட சதவிகிதத்தை அந்தந்த நிறுவனங்களிலிருந்து அரசாங்கம் வசூலித்துக் கொள்ளலாம்.

குறுந்தொழில் அதிபர்களில் திறமையாகவும் நேர்மையாகவும் செயல்படும் நபர்களுக்கு ஊக்கத்தொகை அளிக்கலாம். பொதுமக்களின் மத்தியில் அவர்களையும் அவரது நிறுவனப் பொருள்களையும் பிரபலப்படுத்தலாம். அரசாங்க விழாக்கள் மற்றும் அரசாங்கக் கண்காட்சிகள் போன்றவை நடக்கும்பொழுது, இந்தக் குறுந்தொழில் நிறுவனங்களின் பொருள்களை அத்தகைய இடங்களில் விளம்பரப்படுத்துவதற்கு அனுமதிக்கலாம்.
அரசாங்கமே, பல கண்காட்சிகளை வெவ்வேறு பிரிவுகளுக்காக நடத்தலாம். இந்தியாவை பொருத்தமட்டில் முறையாகப் பதிவு செய்து சரியாக வரிகள் செலுத்தி, நிலையாக குறு மற்றும் சிறுதொழிலை நடத்தும் நிறுவனங்கள் இன்னும் குறைவாகவே உள்ளது. (Organised SME Sector) மாறாக, சில விசிடிங் கார்ட்டுகள் மற்றும் லெட்டர் பேடுகள், ஒரு கைப்பேசி எண் இவற்றைக் கொண்டு சிறு தொழில் செய்வதாக பாவனை செய்து கொண்டிருக்கும் நபர்களே அதிகம். அங்கீகாரம் இல்லாமல் தொழில் நடத்தும் நிறுவனங்களால் அரசாங்கத்துக்கு எத்தனையோ கோடி வருமான இழப்பு ஏற்படுகிறது.

என் அனுபவத்தில் பல குறுந்தொழில் அதிபர்கள் எந்த வித பதிவுகளுமின்றி கோடிக்கணக்கில் வியாபாரத்தில் ஈடுபடுகின்றனர். கருப்பு பணப்புழக்கத்தை நாட்டில் அதிகப்படுத்துவதில் இதைப் போன்ற நபர்களின் பங்கு கணிசமானது. இவர்களை அடையாளம் கண்டு, சட்டத்தை கடுமையாக்கி தண்டனைக்கு உட்படுத்தினாலன்றி, இந்தப் பிரச்னை முடிவுக்கு வராது. இந்தச் சூழலில் நாட்டுப்பற்றோடு சமுதாய நோக்கோடு, தானும் வாழ்ந்து பிறரும் வாழ, தொழிலின் துன்பங்களை ஏற்க முன் வரும் நபர்கள் மனச்சோர்வு அடைகிறார்கள்.

பெரும்பாலான சிறு தொழிலதிபர்களுக்கு, போடும் முதலீட்டை திருப்பி எடுக்கவே நெடுங்காலமாகிறது. இத்தகைய நிகழ்கால அச்சுறுத்தலால், தொழில் செய்ய திறமையுள்ள பல தனி நபர்கள் முடங்கிப் போகின்றனர். அதனால் அரசாங்கம் முழு வீச்சாக நடைமுறை சிக்கல்களைக் களைந்து, இன்னும் விழிப்புணர்ச்சியோடு, யதார்த்தமான திட்டங்களைத் தீட்டி குறுந்தொழில் மற்றும் சிறுதொழில் உயிர்ப்புடன் இருப்பதற்கு முனையவில்லையென்றால், இன்னும் சில வருடங்களில், திறமையிருந்தும், தொழில் செய்ய முன்வருவது நின்றுவிடும்.

மக்கள்தொகை பெருக்கமுள்ள இந்தியா போன்ற நாடுகளில், குறுந்தொழில்களின் அழிவு பெரிய பொருளாதாரச் சிக்கல்களையும் வேலையில்லா திண்டாட்டத்தையும் ஏற்படுத்தும். அரசுடைமையாக்கப்பட்ட வங்கிகளோ, ஒரு தொழிலின் தன்மை, அதற்குரிய சந்தை போன்றவற்றை நுணுக்கத்தோடு ஆராய்வதை விட்டுவிட்டு, பிணையாக கொடுப்பதற்கு அசையா சொத்து இருக்கும் பட்சத்தில் மட்டும் கடன் கொடுக்க முன் வருகின்றனர். இது ஒரு நகைப்புக்குரிய விஷயமாகும். அதாவது தொழில் உருவாக்குவதிலும், வளர்ப்பதிலும் கவனத்தைச் செலுத்தாமல், அது தொய்வடைந்து, தோல்வியடையும்போது தங்கள் பெயரைக் காப்பாற்றிக் கொள்ள அசையாச் சொத்துக்கள் உதவும் என்ற தவறான கண்ணோட்டத்தோடு வேலை செய்கின்றனர்.

உதாரணமாக, கடன் கொடுக்கும் சிறுதொழில்கள் எல்லாம் தோல்வியடையும்போது, அவர்கள் கொடுத்த அசையாச் சொத்துகளை அரசாங்கம் விற்று பணத்தை எடுத்துக்கொள்ளலாம். ஒரு தொழிலதிபரின் தோல்வியின் மூலம், பல புதிய தொழிலதிபர்களை உருவாக்கமுடியாது. புதிய தொழில்கள் உருவாகாத பட்சத்தில், திறமையுள்ள தொழிலதிபர்களின் தொழில்கள் நலிந்து போகாமல் பார்த்துக் கொள்ள வேண்டியது அவசியம். மிக முக்கியமாக அரசாங்கம் சிறு மற்றும் குறுந்தொழில்களுக்கான கலந்தாய்வுக் கூட்டங்களை குறைந்தது மாதத்துக்கு ஒரு முறையாவது, அந்தந்த பகுதிகளில் நடத்த ஏற்பாடுகள் செய்து, வல்லுனர்களை அழைத்து, தொழிலதிபர்களுடன் உரையாடல் செய்தால், தொழிலதிபர்களின் நடைமுறை சிக்கல்களை அறிந்துக் கொள்ள முடியும்.

ஜெயிக்கலாம் தோழி / அத்தியாயம் 27

சென்ட்ரல் பேங்க் ஆஃப் இந்தியா வழங்கும் கடன் உதவிகள் குறித்து இனி பார்ப்போம். உணவு விடுதி, நடமாடும் உணவு விடுதி, சுழல் முறையில் செயல்படும் நூலகம், ஆகியவற்றைத் தொடங்கி நடத்த விரும்பும் பெண் தொழில்முனைவோருக்கு இந்த வங்கி கடனுதவி அளிக்கிறது.

மேலும், தொழிற்கல்வி சார்ந்த பணி, சுயதொழில் வகையில் தேர்ந்த நிபுணத்துவம் கொண்ட சிறந்த மருத்துவர், பொறியாளர், தணிக்கையாளர், கலைஞர்கள், தொழில்நுட்ப வல்லுனர்களுக்கும் கடன்  அளிக்கிறது. அதே போல், சில்லறை வணிகத்தில் ஈடுபடுவோருக்கும் உதவி கிடைக்கிறது.

குறுந்தொழில் மற்றும் கிராம குடிசைத் தொழில், கைத்தறி ஆடை தயாரிப்பு நெசவுத் தொழில், உணவு தயாரிப்பு ஆகியவற்றில் ஈடுபடுவோருக்கு ரூ.50,000 வரை கடனுதவி அளிக்கப்படுகிறது.

கிராமங்களில் விவசாயம் மற்றும் சார்புத்தொழில்கள், பயிர் வளர்ப்பு, மீன், தேனி, பட்டுப்பூச்சி வளர்ப்பு, தோட்டக்கலை, பூந்தோட்டங்கள் பராமரிப்பு மற்றும் விவசாய சார்புடைய தொழில்கள் செய்யும் தொழில்முனைவோருக்கு இந்த வங்கி கடனுதவி அளிக்கிறது.

அரசாங்கத் தரப்பில் வழங்கப்படும் மானியம் பெறவல்ல தொழில்களுக்கும் கடனுதவிகள் கிடைக்கப் பெறுகின்றன. இதற்கான முழு விவரங்களைக் கீழ்கண்ட இணையதளத்தின் வாயிலாக அறியலாம். (www.centralbankofindia.co.in)

0

ஓரியண்டல் பாங்க் ஆஃப் காமர்ஸ் – ஓரியண்டல் மகிலாவிகாஸ் யோஜனா என்ற அமைப்பின் கீழ் பெண் தொழில்முனைவோருக்கு, ரூ. 2 லட்சம் முதல் 10 லட்சம் வரை 2 சதவிகித வட்டி குறைப்புடன் கடன் அளிக்கிறது. 10 லட்சத்துக்கு மேலும் கடனுதவி பெறலாம். தொழிலகங்கள் பெண்களால் நிர்வகிக்கப்பட்டு, 51% பங்குகள் இருக்கும்பட்சத்தில் மேற்கண்ட கடனுதவி பெறலாம். இணையதளம் : http//obcindia.co.in.

ஐசிஐசிஐ வங்கியின் விமன்ஸ் அக்கவுண்ட் என்ற திட்டத்தின்கீழ் பெண்கள் பயன் பெறவும் வாய்ப்புகள் உள்ளன. மேலதிக விவரங்களுக்கு : http://www.icicibank.com

0

உதவிகள் ஒரு பக்கம் இருக்க, நாம் கவனிக்கவேண்டிய மிக முக்கியமான விஷயம், தொழில் தொடங்குவதற்கு உண்மையிலேயே நமக்கு விருப்பமும் உத்தேவகமும் இருக்கிறதா என்பதுதான்.

பொதுவாக பெண்கள் தன்னம்பிக்கை குறைந்தவர்களாகத் தங்களைக் காட்டிக் கொள்வார்கள். அதிலும் இந்தியப் பெண்கள் தங்கள் திறமைகளைப் பின்னுக்குத் தள்ளிவிட்டு, தங்களது குடும்பத்தினர் முன் வாயடைத்து அமைதி காப்பார்கள். அவர்களுடைய திறமை வெளியில் தெரியாது. குடும்பச் சூழலில் பெண்களின் பங்களிப்பு மிக அதிக அளவில் தேவைப்படுவதாலும், சமூகத்தின் எதிர்பார்ப்பும் அதை ஒட்டியே இருப்பதாலும், பெரும்பாலான பெண்கள் வீட்டுக்குள் அடங்கி இருக்கவேண்டிய நிலையே உள்ளது.

இந்தப் பின்னணியில், சுயதொழிலில் ஈடுபட முன்வரும் பெண்கள் தங்களைச் சுயபரிசோதனை செய்துகொள்வது அவசியம். வாழ்க்கையில் அவ்வப்போது எழும் பிரச்னைகளுக்கு ஏற்ப, துணிச்சலுடன் தோல்வியின் பயமின்றி வெற்றியை நோக்கி நடைபோடுபவரா நீங்கள்? தனிப்பட்ட முறையில் சில பல நிகழ்வுகளுக்கு பொறுப்பு எடுத்துக் கொள்பவரா? செய்யும் காரியத்துக்கு ஏற்ப அதற்குரிய அறிவை வளர்த்துக் கொள்வதில் ஆர்வம் உடையவரா? பொதுவாக எந்தவொரு சூழலிலும் இயல்பாக எழும் தடைகளை மீறி, நினைத்த காரியத்தை முழு முயற்சியோடு முடிப்பவரா? நிர்வாகத் திறமைப் பளிச்சிடும்படி செயல் திட்டம் வகுப்பவரா? உங்களை நம்பி ஒரு செயலில் இறங்குவீர்களா? அதற்கான துணிச்சலும் தன்னம்பிக்கையும் உங்களிடம் இருக்கிறதா?

மேற்கூறிய எல்லாவற்றுகும் உங்கள் உண்மையான பதில் ‘ஆம்’ என்றால் மட்டுமே நீங்கள் சுயதொழிலுக்கு ஏற்றவர்.

இனிவரும் காலங்களில் என்னென்ன தொழில் செய்தால் முன்னேற்றம் காண முடியும்?
இருபது இருபத்தைந்து வருடங்களுக்கு முன்பு வரை சுயதொழில் என்றால் சமையல் பொடி, ஊறுகாய், அப்பளம், தையல் என்றுதான் நினைப்பார்கள். இன்றளவும் இந்தத் துறைகளில் பெண்கள் ஈடுபட்டு வந்தபோதும், அவர்களுக்கான தொழில் வாய்ப்புகள் இவற்றையும் கடந்து பெருமளவில் விரிவடைந்துள்ளன.

• கணினிச் சார்ந்த சேவை பிரிவுகள்
• கணினி வணிகம். இதில் ஏற்றுமதிக்கு அரிய வாய்ப்புகள் உள்ளன.
• மல்டிமீடியா உள்ளிட்ட வரைகலை துறைகள்.
• சுற்றுச்சூழல் பாதுகாப்பு தொடர்பான பொருள்கள் உற்பத்தி.
• ஈவெண்ட் மேனேஜ்மெண்ட்.
• சுற்றுலாத் துறை.
• பிளாஸ்டிக் மூலப்பொருள்களைக் கொண்டு தொழில் தொடங்குதல்.
• குடிநீர் வழங்குதல் மற்றும் குடிநீர் சுத்திகரிப்பு ஆலைகள் நிறுவுதல்.
• உணவு, காய்கறி போன்றவற்றைப் பதப்படுத்தும் தொழில்.
• பூ அலங்காரம், வீட்டு அலங்காரம்.
• மூலிகைகள் மற்றும் உடல் ஆரோக்கியம் சம்பந்தமான பொருள்களை விற்பனை செய்தல்.
• கல்வி பயிற்சி மையங்களை நிறுவுதல்.
• இயற்கை உரம் உற்பத்தி செய்தல்.

இப்படிச் சொல்லிக்கொண்டே போகலாம்.

நம்மைச் சுற்றியுள்ள பிரச்னைகளும்கூட நமக்கான தொழில் வாய்ப்பை வழங்கக்கூடிய திறன் படைத்தவை.   ஒரு பெண் சுமாராகப் படித்தவராக இருந்தாலும், மனித தொடர்பு கலையில் தேர்ச்சி பெற்றிருந்தால் நல்லதொரு வாய்ப்பை அவரால் ஏற்படுத்திக்கொள்ளமுடியும். உதாரணத்துக்கு, வீட்டு வேலைக்கு ஆள்கள் அனுப்பும் சேவை மையம் தொடங்கலாம். இதன் மூலம் வருமானத்தை ஈட்டலாம்.

இதை ஒரு தொழிலாக செய்வது எப்படி? உதாரணமாக லட்சுமி என்ற பெண்மணி இதை தொடங்க நினைக்கிறார் என்றால் அவர் முதலில் அக்கம்பக்கத்து வீடுகளிலலும் சுற்றியுள்ள வீடுகளிலும் நல்ல நட்பை நாகரிகமாக வளர்த்துக் கொள்ள வேண்டும். இரண்டாவது, ஒவ்வொரு வளமுடைய நகர் பகுதிக்கு அருகிலும் அல்லது அதைச் சுற்றியும் வளமையில்லாத குடிசைப் பகுதிகளோ குடிசைமாற்று வாரியமோ இருப்பது இயல்பான ஒன்று.

சென்னை, மும்பை போன்ற பெரும் நகரங்களில் இதைக் கண்கூடாகப் பார்த்திருக்கலாம்.
லட்சுமி செய்ய வேண்டியது, அதைப் போன்ற குடிசைப் பகுதிகளிலும், குடிசைமாற்று வாரியங்களிலும் சரியான நபர்களை அடையாளம் காண்பது. பிறகு அவர்களைப் பணிக்கு அழைப்பது.  நுணுக்கமாக மனிதர்களை எடைபோட பழகிக் கொள்ளுதல் இதற்கு அவசியம். அருகிலுள்ள காவல் நிலைய உயர் அதிகாரிகளை தொடர்பில் கொண்டு, தன்னுடைய சேவை மையத்தின் நோக்கத்தையும், தான் வேலைக்கு அமர்த்தும் பெண்களின் பின்புலத்தையும் கேட்டு அறிந்துக் கொள்ள வேண்டும்.

அதே போல் சமூகத்தில் பின் தங்கியுள்ள வேலைக்கு அமர்த்தும் பெண்களின் பாதுகாப்பையும் மனதில் கொண்டு, அவர்களை வேலைக்கு எடுத்துக் கொள்ளும் வசதி படைத்தவர்களிடமும் பேச வேண்டும். அவர்களை மனித நேயத்தோடு நடத்துமாறு வற்புறுத்த வேண்டும். பாலியல் கொடுமைகளுக்கு பெண்கள் ஆளாகாதவாறு பார்த்துக் கொள்ள வேண்டும்.

தேர்ந்தெடுக்கும் பெண்களுக்கு முதலில் ஒரு சில நாட்கள், மனிதவள பயிற்சி அளிக்க வேண்டும். மாதம் ஒரு முறையாவது அவர்களைச் சந்தித்து அவர்கள் பிரச்சனைகளைக் கண்டறியவேண்டும். அதேப்போல் அவர்களைப் பணிக்கு அமர்த்தும் வீட்டுத் தலைவர்களையும் தலைவிகளையும் சந்தித்து, இவர்களின் பணி குறித்து ஏதேனும் அதிருப்தி உள்ளதா என்று தெரிந்துகொள்ள வேண்டும்.

இதைப்போன்று நிர்வாக திறமையோடு செயல்பாட்டால் நிச்சயமாக இவரது சேவை மையம் ஒரு நல்ல நிறுவனமாக மாறும் வாய்ப்பு உண்டு. லட்சுமி இத்தொழில் மூலம், பணம் சம்பாதிப்பது மட்டுமல்லாது, சுற்றியுள்ள சமூகத்தின் தேவைக்கும் வழி வகுப்பவராக மாறுகிறார்.

ஜெயிக்கலாம் தோழி / அத்தியாயம் 29

எதையாவது இலவசமாகவோ அல்லது டிஸ்கவுண்ட் என்ற பெயரில் சிறிது விலையைக் குறைத்து கொடுத்தாலோ மட்டுமே ஒரு பொருளை வாங்கும் மனோபாவம் பலரிடம் இருக்கிறது. சொல்லும் விலையைக் கொடுத்து ஒரு பொருளை வாங்கும்போது திருப்தி ஏற்படுவதில்லை. தங்கமாக இருந்தாலும் சரி, குண்டூசியாக இருந்தாலும் சரி.

ஒரு பொருள் விற்கப்படும் பொழுது அதனால் விற்பவருக்கு நஷ்டம் ஏற்பட்டால் அந்தப் பொருள் தொழிலுக்குரிய தகுதியை இழந்து விடுகிறது. அப்படியென்றால் டிஸ்கவுண்ட் எப்படிக் கொடுக்கப்படுகிறது? நேர்மையற்ற சிலர் பொருளின் விலையை அதிகப்படுத்தி பின்னர் சிறிது குறைக்கின்றனர். இன்னும் சிலர், தங்களுடைய லாபத்தில் இருந்து குறைத்துக்கொண்டு அதன் பங்கை வாடிக்கையாளர்களுக்கு அளிப்பார்கள். இதுவே சரியான நடைமுறையாகும்.

பெரிய ஷாப்பிங் மால்களில் ஃபிக்ஸட் பிரைஸ் எனப்படும் நிர்ணயிக்கப்பட்ட விலைப் பலகைகள் தொங்கிக்கொண்டிருக்கும். இந்த வகை கடைகளில் டிஸ்கவுண்ட் கிடைக்காது. வாடிக்கையாளர்களும் மௌனமாக சொன்ன விலைக்குப் பொருள்களை வாங்கிச் சென்றுவிடுவார்கள். பேரம் பேசுவது எல்லாம் சிறு வியாபாரிகளிடம் மட்டும்தான்.

உண்மையில், நிர்ணயித்த விலையைக் காட்டிலும் மிக அதிக அளவில் விலைக் குறைப்பு செய்தால், நாம் உற்சாகப்படக்கூடாது. உஷாராகவேண்டும். ஸ்டாக் க்ளியரன்ஸ் என்று சொல்லி சரக்குகளைத் தீர்ப்பவர்களிடமும் எச்சரிக்கையாக இருக்கவேண்டும். ஒரு பொருள் வாங்கினால் ஒன்று இலவசம் என்பதும் பொருள் வாங்கினால் மற்றொரு பொருள் இலவசம் என்பது வியாபார உத்திகளே. விற்பனையாகாத அல்லது கொள்முதல் ஆகாத பொருள்களே இவ்வாறு கவர்ச்சிகரமாகத் தள்ளிவிடப்படுகின்றன. எந்தப் பொருள் அதிகம் விற்பனையாகிறதோ அதன் விலையைக்கூட்டி விற்காத பொருளை இலவசம் என்று இணைத்து விற்றுவிடுவார்கள்.

நிறுவனங்களை மக்கள் புரிந்துகொள்வது எவ்வளவு அவசியமோ அவ்வளவு அவசியம் மக்கள் நிறுவனங்களைப் புரிந்துகொள்வதும். பல கார்பரேட் நிறுவனங்கள் இதற்காக மார்கெட் ரிசர்ச் பிரிவுக்குப் பல கோடிகள் செலவு செய்கின்றன. மக்களின் மனநிலையையும் தேவைகளையும் புரிந்துகொண்டு அதற்கேற்பவே ஒரு நிறுவனம் தன் பொருள்களைச் சந்தைப்படுத்துகின்றன. ஒரு பொருள் யாருக்குத் தேவைப்படுகிறது? (டார்கெட் ஆடியன்ஸ்) அவர்களுடைய சமூகப் பின்னணி என்ன? வயது என்ன? பொருளாதாரப் பின்னணி என்ன? எவ்வளவு விலை வைத்தால் அவர்களால் வாங்கமுடியும்? போன்ற கேள்விகளுக்கான விடைகளைத் தெரிந்துகொண்டால்தான் வெற்றி கிடைக்கும்.

திரைப்படத் துறையினர் இந்த ரீதியில் வெற்றி பெறுவதை நாம் பார்க்கமுடியும். திறமையான மார்க்கெட்டிங் உத்திகளைப் பயன்படுத்தியே திரைப்படங்களின் வெற்றி இன்று உறுதி செய்யப்படுகிறது. சமீபத்திய கொலைவெறி பாடல் ஹிட் ஆனதை இங்கே பொருத்தமான உதாரணமாகச் சொல்லலாம்.

சில தொழில்கள் அபாரமான வெற்றிகளை அடையாவிட்டாலும்கூட, உயிரோட்டமாக மினிமம் கியாரண்டியுடன் தங்கள் பொருள்களை விற்று சமூகத்தில் நல்ல பெயரைச் சம்பாதித்துக்கொள்கின்றன. பல குறுந்தொழில்கள் இந்த வகையைச் சேர்ந்தவை.

0

சட்டபூர்வமான அங்கீகாரத்துடன் மட்டுமே எந்தவொரு தொழிலையும் தொடங்கி நடத்தவேண்டும். சிலர் பெயர் பலகை இல்லாமல், உரிய முறையான சட்ட ரீதியான பதிவுகளை மேற்கொள்ளாமல் தமது வேலையில் ஈடுபட்டிருப்பர். பின்னர் வளர்ச்சி அடையும் நிலையில், முன்னரே உரிய பதிப்புகள் மேற்கொள்ளாத காரணத்தால்,சில நல்ல பயன்களை அடையத் தவறிவிடுவர். தமது நிறுவனத்தின் இருப்பிடத்தை வணிக வளாகம் என்ற பிரிவின் கீழ் மின்சார வாரியத்தில் பதிவு செய்யாமல் இருத்தல், அரசாங்கத்துக்குரிய வரிகளைச் சரிவரச் செலுத்தாது இருத்தல் ஆகியவை பின்னாள்களில் மிகுந்த சிக்கல்களை ஏற்படுத்தும்.

சரிவர முறையாகச் செயல்படாததால், அரசாங்கம், சுங்கம், மின்சார வாரியம் ஆகிய பிரிவுகளிலிருந்து திடீர் சோதனைகள் நடைபெற்றால் பிடிபட வாய்ப்பு இருக்கிறது. அவ்வாறு நிகழ்ந்துவிட்டால் பணம், நேரம் இரண்டையும் மிக அதிகம் செலவு செய்து தவறுகளைச் சரிசெய்துகொள்ள நேரிடும். தேவையற்ற மனச்சோர்வும் ஏற்படும்.

அதேபோல சிறுதொழில் (எஸ்எஸ்ஐ), தனியார் நிறுவனம் (பிரைவேட் லிமிடெட்), ப்ரொப்பரைட்டர் கன்சர்ன் ஆகியவற்றை உரிய முறையில் பதிவு செய்யவேண்டும். விற்பனை வரி, சேவை வரி, TDS  போன்ற வரிகளைச் சரியான முறையில் செலுத்தவேண்டும்.

தொழிலுக்குப் பொருத்தமான தரச் சான்றிதழ்களைப் பெற்றுக்கொள்வதும் நன்மை அளிக்கும். அக்மார்க், ஐஎஸ்ஐ போன்ற தரக்கட்டுப்பாடுகள் அவசியம் எனில், அதற்குரிய நடவடிக்கையை எடுக்கவேண்டும்.

0

சிறுதொழில்கள் பல்வேறு பிரச்னைகளைச் சந்தித்து வருகின்றன. அதில் முதன்மையானது உலகமயமாக்கலின் தாக்கம். இன்றைய சூழலில் மிகக் குறிப்பிட்ட சில தொழில்களைத் தவிர, அனைத்தும் தொழில்நுட்பத்தின் வேகத்துக்கு ஈடுகொடுக்க முடியாமல் திணறிக்கொண்டிருக்கின்றன. சுதேசி இயக்கத்தைப் போற்றி முன்னிறுத்திய நம் நாடு இன்று பல நாடுகளின் தொழில்நுட்பத்தை நம்பியே இயங்கி வருகின்றன. இப்படிப்பட்ட நிறுவனங்கள் சூழலுக்கு ஏற்ப தன்னை மாற்றியமைத்துக்கொள்வது அவசியம்.

அந்த வகையில் சிறுதொழில் செய்பவர்கள் தங்கள் நிறுவனம் சார்ந்த தொழில் நுட்பம் எந்த வகையில் எல்லாம் மாறி வருகிறது என்பதையும், அந்தந்த நிறுவனத்தின் வாடிக்கையாளர்கள் அந்த நிறுவனத்திடமிருந்து எதை எதிர்பார்க்கின்றார்கள் என்பதையும், தெளிவுப்படுத்திக்கொள்ள வேண்டும். இதற்கு இணையதளம் பெரிதும் பயன்படும். உலகளவில் நடக்கும் மாற்றங்களைத் தெரிந்துகொண்டு, பொருட்களின் ஏற்றுமதி அல்லது இறக்குமதி சார்ந்த முடிவெடுக்கலாம்.

பிறநாட்டு நிறுவனங்களோடு வணிகத் தொடர்பு ஏற்படுத்திக் கொள்ளும்போது, கவனத்தில் கொள்ள வேண்டிய சில விஷயங்கள் இவை.
ஒவ்வொரு பன்னாட்டு நிறுவனமும் அயல்நாட்டு வணிகத்தில் பெரும் ஈடுபாடு காட்டினாலும், தாங்கள் யாருடன் தொழில் உறவில் ஈடுபடப் போகிறார்களோ, அவர்களுடைய பின்னணியைத் தெரிந்து கொண்ட பின்னரே, தொழில் செய்யத் தொடங்குவர். அதேபோல், நாமும் அந்தந்த நிறுவனத்தின் பின்னணியைப் பற்றித் தெரிந்து கொள்வது இன்றியமையாதது.

எந்தவொரு நிறுவனத்தின் பணபலத்தைவிட, அவர்கள் தங்கள் நாட்டில் பெற்றிருக்கும் நற்பெயரும், வியாபார நாணயமும்தான் மற்றவர்களை ஈர்க்கும். இன்று பிரபலமான பல நிறுவனங்கள், பல்வேறு நாடுகளுக்கிடையே உள்ள நிறுவனங்களை ஒன்றிணைப்பதில் பெரும் பங்கு வகிக்கின்றன. இன்னும் சொல்லப்போனால், சில நிறுவனங்கள் இதற்கென உள்ள வணிகச் சந்தையை ஆராய்ச்சி செய்யும் நிறுவனங்களுக்குப் பணம் கொடுத்து, தாங்கள் யாருடன் தொடர்பு கொள்ள வேண்டும் என்று நினைக்கிறார்களோ, அவர்களுடைய பலம், பலவீனங்களை முன்கூட்டியே தெரிந்து கொண்டு தொழில் தொடர்பை விரிவுபடுத்துகின்றன.

தொழிலில் நிலைநிற்பதற்கு அல்லது தொடர்ந்து செல்வதற்கு, நம் அணுகுமுறையை மாற்றிக்கொள்ள வேண்டிய கட்டாயச் சூழ்நிலை ஏற்பட்டுள்ளது. இந்த மாற்றத்தைக் கண்டு அச்சப்படாமல், அந்த ஓட்டத்துக்கு ஈடுகொடுக்க மனதளவில் நம்மைத் தயார் செய்து கொள்ளவேண்டும். அவ்வாறு செய்தால் நம் தொழில் வீழ்ந்துவிடுமோ என்ற அச்சம் மறைய வாய்ப்புள்ளது. இல்லாவிட்டால் நம் தொழில் நம் கண்முன்பே நொடித்துப்போகும்.

நாம் எந்தந்த நாட்டுடன் வியாபாரத் தொடர்பை ஏற்படுத்திக் கொள்ள விரும்புகின்றோமோ, அந்தந்த நாட்டின் வியாபாரக் குறிக்கோள்கள், வியாபார உத்திகள், கலாசாரம் முதலியவற்றைத் தெரிந்து கொள்வது மிக அவசியம். எந்த நிறுவனத்தோடு தொடர்பை ஏற்படுத்திக் கொண்டாலும், அந்த நிறுவனத்தின் மனிதர்களோடு பழகுகிறோம். அந்தச் சூழலுக்கும், புதிய மனிதர்களின் விருப்பு வெறுப்புகளை எடைபோட்டுப் பார்த்தும், நம் அணுகுமுறையைத் தக்கவாறு மாற்றிக்கொண்டும் செல்வது இன்றியமையாதது.

ஏற்றுமதி, இறக்குமதி தொழில்களின் வாங்கும், விற்கும் பொருளைப்பற்றி நாம் எவ்வாறு ஆராய்கிறோமோ, அதே போல் கொண்டு செல்லும், கொண்டு வரும் வழிவகைகளையும் நுணுக்கமாக ஆராய்வது முக்கியம். உலக வரைபடத்தை வைத்துக் கொண்டு நாம் பொருட்களைக் கொண்டு வரும் அல்லது கொண்டு செல்லும் மார்க்கங்கள் என்ன? கடல்வழி மார்க்கமா? தரைவழி மார்க்கமா? சுங்கத் தீர்வின் அளவு என்ன? எப்படி பேக்கேஜ் செய்வது? என்று பல கேள்விகளுக்கு விடைகள் தெரிந்துகொள்ளவேண்டும்.